PHILH TUAN HAR LAI

Dawt zuun

 Tuni cu zingka tein Khua a chiat ruangah leng ka chuak kholo i ka dawng le Siang an kai dih ruangah keimah te lawng innah cun ka um. Ihkhum cung cun ka Cell Phone charge pahin ka tuai cuahmah lioah ka lung chung i a riak peng mi, ka hmuhton lo nak a sau ngai cang rawh   mi cu duak tiah a hun i hlau. Ka phone cu ka tuai zok zok i a min 'K' tiah ka tialmi cu ka hun call. Vawi dang khello bang chikhat teah a ngah colh ko. Vawi dang tawnah cun phone hi a tlang zok kho lo i sau lak te nolh a hau cu hmanhah a phanh khawhlo caan hi a tlawm lo.

Ka keh leiin ka Phone cu ka Hna cun ka hun beh; a rauh hlanah fiang ngaiin 'Hello' ti thawng. A aw-aan cun khuaruahhar ruangah lau nawn khi a lo. Aize, ka theih balmi aw a si khi chimh haulo khin kaa fiang nain ka theihlonak bel a sau cang. Ka khawsiksaisem nih ur tiah a tho i, hngap tiah ka khel kai leh pah khin ' Hello'  tiah ka hun leh; 'na dam ma? tu hi zei dah na tuah e?' tiah ka bia cu ka hun peh. ' Aw ka dam lio te si hi, ka um sawh ko; nangteh na dam maw?' tiah a hun ka leh tthan. Rei ial te kan i chawnh hnuah caan dangah aa chawn tthan te ding khin kan bia kan dongh i, cu ni ka lungah thil dang a lang kho lo, caan liam cia hna le thil sining hna ruatin ka ruahnaknih cun fing le tlang kip a cul.

October thla dongh lei khin ka umnak Aizawlin siang kai ka lim rawh hnuah  ka nu nih ' Khua leiah rak tlung ta law, ka cehcaklo tuk caah rian ka tuan kho setlo i, Civui hmang ding hna kan si fawn, ti thing tal na kan lakpiak ta lai' a ti caah le Cacawnah kaadang i kan um peng ruangah Civui zong cu ka hmang ve ballo i hman ve ka duh ruangah khua lei panhin tlun kaa thawh. Khua ka tlun ni bak hi Civui thawk zaan le khual tlun zaan a si. Hi zan hi Inn kan phak tlai deuh ruangah le ka chung le nih an ka ngaih pah ruangah kaa pum manhlo i ka nu le pa tiin Tappi hram cun sau ngai bia kan i ruah hna.

A thaizing ah cun pumh cu kaa thawh ve nain Biak Inn a hmet deuh caah thutnak kan tinglo i khualtu kan kenh hna. Kan mino upa le ka hawi le nih cun leng i lakphak ti an chuannak ah ra ve dingin an ka auh caah ka kal ve i, cuti cun pumh cu kan tin. Zanlei sang khin Kuhva dawr ah cun kan tthu hna i biasawng kan hei tlorh pah salam lio khin ngaknu pahnih kuhva cawk awkah kan umnak lei panhin a ra mi khi ka hei hmuh hna. Pakhat cu ka theih balmi Parku a si; a hawinu bel cu khawika mi dah si hnga? A mitau panh ning le tungtai that ning; A hmaitlang nih aa rem, cu tluk nute chuah thiam cu! Ka lung chung cu bia halnak lawng, mirh nawn khin ka hun zoh pah khin Parku cu ka hun chonh, 'Nan rak tlung ve mu, nan dam ttha maw?'tiah. 'Aw kan dam lio te si hi, nang tu zeitik dah na tlun e' tiah a hun ka leh i, nizan ah ka phan ve bak si tiah ka leh pah khin a hawinu cu khawika mi dah si le a min hna ka hun hal. A ka chimh hnuin a muithat ning le duhnun ning hna chim pah khin leen a nghah maw tiah ka hun chapo chih. A mit te cu aa khun i a hmai sen thliahmah khin din nawn tein sau a ni lo..


Zan pumh caan cu ka hung phan, kan nih tu cu Lakphak ti le a meh ding Arti chuan pah khin meiphu hramah biasawng kan tlorh hna. Caan an thawk hnu, phungchimtu an auh hlanah Bial Hlaremhbu nih Thangtthatnak hla an sak caan silai tiah chairman nih a hun phuan cu, nunau pawl le thutnak tinglo lenglei tthu mi pawl cu kan mahle siarem hoih cioin kutka zawn khin kan cuan hna. Hlasak an van thawk cu an thiam tak tak, an aw thawt ning le zoh an co khawhning bak hi a mak. Cu lio ah cun ka mit tthial kholo bak in a ka tuahtu cu keh lei kap a hriang dawt i a dir mi cu si. A hlasak lio umtu le muihmai nih cun ka lung cu a suk ngai caah an hla zong cu ruat lo khin amah lawng bak cu ttheplo khin ka hun zoh. Um, hi nu hi si, zanlei i ka hmuhmi le ka capo mi kha. Zan lei nak khan pei duh a nun deuh hi tiah ka lung cun ka ti. Duak tiah ka dirnak cun ka hun i hlau i, ka hawile umnak cu ka panh. Ziah hen hitin ka um tiah keimah le keimah cu ka el. A tak tak tiah cun hi hlaremhbu hna lak hin muiin si seh,tungtai that le aw thatin siseh a rualhawi lak hin a cuang khun i, nu le pa tlangvaal dang cio zong nih zoh dawh an ti ciomi le an mit a futnak cem zong a rak si ve. A theih lo khin ka nun cu a lakah a rak no cang khi si kaw, ka mawh ve hrim lo. Zeitin dah pehtlaih dan ka dah hnga aw tiah kaa ruat i, pehtlaihlo cun ka um bak lai lo. Cu lioah cun Sermon pumh cu a dong i lakphak din khawhah zaikhawm peh tthan ding khi si. Lakphak cu kan tlet zok zok i an hun i lak cio hna. Ka mit cun khawiah dah a um hnga tiah ka rak cuanh peng mi cu an mino hruaitu hna he an dirti khi ka hei hmuh. Tu hi caan cu a si, tu ka chonhlo cun caan umti hlah sehlaw a poi tuk lai, nain ka fuh ngam zok lo. Ka lung lu det det tiah rang nawn khin a tur i, chonhbiak ka duhnak le ka ngaihlah nak cu a sual khin aa sual nain pasal tiah i forh pah khin ka hun fuh. Parku nih zanleiah khan a min a ka chimh cang ruangah 'Kipte', tiah  ka hun auh i panh tein a ka leh ve. An hla remh lio i a zohdawh ning le duhnung a si ning hna ka chimh hnuah a Phone number hna cu ka hal i a ka pek i, zaikhawm an awt deng ruangah Biak Inn chung cun a lut tthan.

Cu lio cun kan naupa Tin Cung zong Biak Inn tual i aa hee leen khi ka hei hmuh. Ziah cuti naa hee thluai ko tiah ka ti i, khual nungak lakah khan hlasak thiam Suite nau, a min Boirem tiah an auh mi kha a rak helhhum si kaw, a bumban nih ttha tung, a Pull Over (angki cung thuah)Khakhi muici pi he cun a thawpi cu a vun chuah. A ngaknu helhhum mi cu a hun ka sawhpiak i zeitin dah si hnga tiah a hun ka ruah. Muika khan  Boirem he hin kan rak i chonh cang ruang le kan naupa Tin Cung hi uar a um ning le a fel ning hna a rak ka chimh cang ruangah, 'A ttha ko, uar zong an uar ko, ka theih tuk, nain nam khukhut hlah law, tthatein na chonhbiak phawt lai cuh' tiah chonh biak ning kha kan i ruah i, ttihchuk ngamhchuk i a ummi kan naupa cu thazaang ka hun pek. Van tthatah Boirem te cu Zung dingin a rak chuak i, Tin cung he cun kuhva va damh uh tiah kan fial hna. Cuti an va kal pah cun bia tam lak te an i ruah i, i theihthiamnak le pehtlaihnak thuk ngai an ngei manh si kaw, Tin Cung ka pawng a hung phan cu(h), ' E.., na ka chimh mi a hman bak, ka Hmur hih!' tiah a kutpi cu tthok thok tiah a hun beb! Cu lioah kan u pa Buanga zong thlanglei Lamthar sang i a tlungmi Mawite ka thlah(zulh) lo cun si kho lo, ka sah lai tiah a hacang a rak i rial leen ve. Pumh ttin hnu cun kan u pa zulin thlanglei sang cun mui padap lakah kan i zul hna i, Mawite cu aa kuh tthup ve ko nain an hmaiah kan kal ruangah a sah le sah lo tu cu kan thei lo nain ' Na hngaltaam' ti le 'Awi ka ningzak e..' ti thawng lawng khi kan theih khawh.


Cuti cun, Civui cu zarhpi zaanah a ttiak i, a thai zing, cawn nikhat ni ei hlanin khual pawl cu an tlung diam hna. Ttuan ni hnih ni zaan suimilaam pakua hrawng khin U Buang te incar in ka phone number ngeih thar mi cu ka hei call i, Cu tluk duhnung hawikom ka ngeih mi cungah kaa lomhnak le ka uar phun te a si ning ka chimh hnuah pau hlarh marh tein a ka chawn biatu aw-aan nih cun ka lung a tawn lawng hmanh siloin ruahchannak tampi le ralthatnak khi a ka pek i, zaan ih a nomhter pinah mitkuh a thawtter khun. Zarhteni kan phak cun U Buang cu kaa sawm i na ka leenpi lo cun si kho lo tiah, ka bia el a hreh ruangah a ka zulh. U Buang hi hawikomh thiam ngai mi le mi mithmai zoh thiam ngai mi, bia chim kau phawh zong thiam ngaimi si tikah kan i bochan ngai mi khi si. Kipte te in cu kan vung phan i, a Ni le he an rak um lio te khi si. Bia kan i ruahpah chuahmah lio khin U Buang nih aa thawh i, 'hi ka nau Dawtzuun nih hin nangmah leen le hmuhton hi cithlum hauhin a ka hauh i si kan rak rat nak' tiah capo bia tak khin a hun ti. Tlawmpal ah Kuhva cawk ah a kan chuahtak i cuti cun ka lungchung um bia cu ka hei ruah nain a phi utu kan chuah lo. Zaan ah cun Phone in ka hei chonh i a phi cu ttha tein a ka pek caah lawmbia hna ka chimh i hmailei kan nun dan ding le kan karlak fehternak dingah cun atu hun le caan zel ah hin i daw u sih law, I theithiam u sih law, zeizong vialte a thluang ko hnga tiah ka hei ti. Cu tluk ngaknu duhnung, ka vawikhat hmuhnakin ka lung sutu le kaa thim mi nih duhdawtnakin kan nun ttemttawn i pakhat le pakhat i nunhnawh awkah hnatlaknak a ka ngeihpi cu si kaw, a nuamh ning le kaa lomhnak san ning cu a mak kho tuk, nunman hna hi ngei chap deuh ngai khin si kaa ruah. A colhleh nilai zan cun hawihlanah rawl ka ei i, U Buang he cun leen cu kan i thawh tthan. Kipte tein kan phak hnuin U Buang tu cu ngaknu dang leenah a ka chuahtak tthan i, bia kan hei i ruah luklak hnuin a nu le pa cu ihkhanah an lut i kan pahnih cun thlanglei kap thlalang awng hram cun kan tthu. Tu hi kan i uar thawk i hmunkhat kan tthut tti hmaisa bik a si. A mit cu ka hun zoh i a hun ka zoh ve, kan mit a van i ton bak khin a hmai te cu sen thliahmah nain ka hun naih deuh chin. A liang cung cun ka kut ka hun chiah i a hun ka mirh khi cu, aize, duh a nun ning! Ziama tein a lu cu ka hun mer i, a vawikhatnak dingin a hmur sen siarmar mi te cu ka hun hnamh, a ka let lo. A biangki cu zah ruangah a sen chap ti cu kai fiang ko. A vawi hnihnak dingah ka hun hnamh nolh khi cu zak leen ko hmanh seh dawtnak ruangah nun aa hrawm ding le i uaihnawh awkah bia kan ttem cang nak thei buin a hun ka leh ve bak khi cu, maw ka nu te, lung a hmui khawh ning le kaa lomh ning cu a thuk in a sang i, ka nun pum cu " Lawmnaa khat rilru thianghlim, A mawi tuktin par aiin" tiah lomhnak hla cu an sa. Cuti cun, bia lungduh i ruahpah le capo bia hna sai pahin caan kan hman cuahmah lioah leng leiin inka kingh thawng nih a kan hlauh. Midang siloin U Buang si lai ti kaa fiang ko. Kan tthutsia kan i remh hnuin raklut tiah a hei chonh i a hung lut colh ve. Nazi ka hun zoh cu suimilaam 10 : 30pm a si cang. Ai ze law, tlun a cu ne! Tlun ka zuamlo ning le Kipte kiangkap um ka cimlo ning kha mu. Khuakhat kan silo ruang le kan khua le Kipte te khua hi meng 7 aa hlatmi si ruangah tlun cu hau ttung. Cim lo ngai le siaherh cukmak khin 'Zaanttha tuk mu'  tiah a kan thlah i, an in tlang kan liam hlan tiang khi a kan cuanh peng.

 Tluang dang hram cu nifa tin le zaan chiar i tawm duh ko hmanh ning duh poah aa hmutong kho kan silo i, ton lai ni  hngahhlang ngaiin kan um i, zan chhiar te ca cu kan i kua  tawn i kan i chawn tawn. to be cont.