HERO I-LEAGUE CHAMPION AIZAWL FC

Hero I-league ah Mizoram team Aizawl FC cu a thiam cem an si. Hero I-league hi India ram chung league vialte lakah a upa cem a si i, FIFA nghalhpi mi league a si fawn.

Aizawl FC hi nikum lei khan hi league ah hin an rak i tel cang, hmanhselaw team 9 lakah 8 naak lawng an sikho i, I-league ttang i tthumh an si. Culio ah I-league i tel ding i ruah mi team 2 nih" kan tel kho lailo"tiah AIFF sinah bia an thlah i, cuhnu cun AFC cu i league i a tel dingin auh tthan an si.

Season an thok i, AFC cu zumhnak lengin an cawl ttha, hmanhselaw mipi nih an champion tak tak cu an zum rih hnalo. Cun,kar an hlang ve lengmang i table cunglei lengmangah an um. Match lawng lawng a um cang tiah India ramchung club ngan bikmi Mohun Bagan he point 33 ve ve an si. Cun Aizawl i Mualpi, Rajiv Gandhi Stadium ah an pahnihin an rak i tthua tthan i AFC cu 1-0 in an tei hna. Vawikhat chuih lawng lawng a bau cang. A donghnaak cemah ni 30 April khan AFC nih Jawaharlal Nehru Stadium Shilong ah Shilong Lajong FC an va luhhnawh hna.AFC nih point pakhat lawng lawng an duh cang. Khatleiah Bagan nih point 3 an rak miak i AFC an caklo cun Bagan champion ding an si.

Bawlung chuih cu khatlei khatleiin an thok i, caan a dongh cun Mohun Bagan cu cak ko hmanh hna selaw AFC nih 1-1 in Lajong an draw khawh caah AFC cu I-league champion an si.

AFC hi ni 1.5.2017 khan Aizawl an rak phan i, MFA khuakhaan naak tangah sunglawi ngaiin AR LAMMUAL ah rak don an si. Hi caan ah hin mi tampi an rak raa hna i, politician le celebriries hna zong an tam ngai. Bia chim le hla sak hna tampi ngaih a si. MFA hounorary Secretary Lalnghinglova Hmar zong nih biachim naak caan a ngei i India champion team si cu ruahchannaak in a rak cuanh tawn mi siko hmanhselaw hi tluk i tuan hin cun kan phak lai a zum ballo ning a chim. Cuhnu ah Players ho hna cu Aizawl khuapi chungah chawhpi an si.

"Tangka duh/herh nak a sang ngai, culioah Company lian pipi hna nih an kan chonh ve ko, hmanhselaw kan logo i kross a um ruangah kan lehna kha a sikho tawnloh.  Tangka kan herh ning ruahah cun tangka tampi rak donh cu a har ngai mi a si.  Bawipa nih AFC hi a sunpar naak phuannaak dingah a duh i, kan donh mi vialte kha kan hmu thengloh, hmanhselaw Bawipa nih pumsa ngandamnaakin AFC cu thlua a chuah tthiam tthiam ko" tiah AFC President Robert Romawia Royte nih cun a chim.