GERMANY, ENGLAND, SCOTLAND LE SPAIN AH CUP FINAL CHUIH A SI.

Nizan khan ram 4, England, Scotland, Spain, Germany ah anmah ramchung CUP final chuih a si.

Scotish leiah cun Celtic nih Socttish Cup-ah 2-1 in Aberdeen cu an tei hna i, atu season-chungah Scottish League Championship, Scottish Cup le Scottish League Cup cu teitu hmulo in an lak.

Germany leiah cun  DFB cup final ah Eintracht Frankfurt cu Borussia Dortmund nih 1-2 in an tei hna. Dortmund hi final kum 4 chung peh lengmangin an chuih i, a kum 4 nak lawngah teinaak an hmuh ve.

England leiah cun Arsenal nih FA cup Champion tam cem si dingin Chelsea cu 2-1 in an tei ve hna. Arsenal hi Manchester United he champion tam cem sinaak an i ttawm peng i, atu cun Man United an tlik taak cang hna. Cupinah Arsene Wenger cu manager lakah FA cup la kho bik a si i, vawi 7 a lak cang. Cun players lakah Ashley Cole nih vawi 7 a lak ve i, a la tam cem a si ve.

Spain lei cun FC Barcelona nih Alaves cu 3-1 in Copa del Rey final ah an rak tei ve hna i, peh lengmang i vawi 3 an champion naak a si fawn. Cun Luis Enrigue caah Barcelona a zauhkhenh donghnaak game a si.