Australia Chinmi tambik ifunnak Chin Christian Council in Australia (CCCA) tangah aummi Christian Education Department i Sunday School cawnpiaktu saya/mah te civui

Phongpi : Ram Tinthei ( Australia)

Australia Chinmi tambik ifunnak Chin Christian Council in Australia (CCCA) tangah aummi Christian Education Department i Sunday School cawnpiaktu saya/mah te civui cu ni 2 le zan 3 chung Perth Chin Baptist Church nih inntek sinak an lak i tlamtling takin an tuah. Tutan hi a voikhatnak an tuah asi i, Khrihfabu 12 in aiawhtu 80 leng an itel kho. Khrihfabu 2 an vun itel kholo.

A donghnak zan ah an sinah ka vai i pum kho ve. Cu pumhnak ahcun, CCCA CE Department i Chairman a tuan liomi Salai Amos Siang nih thawng a thanhnak ahcun; Khrihfabu 14 chungah Sunday School cawnpiaktu Saya/mah 101 an um i zarhfatin Sunday School a kaimi hngakchia hi 1,263 an si a ti. Cucu buaktlakin kum 5 in kum 16 karlak an si lai tiin keimah nih ka tuak. Kum 5 tang hngakchia an tamtuk rih lai ning, zarhfatin in Khrihfabu kip ah nauthar thlacampiaknak a um ti tluk asi. Atu CCCA ahhin; Falam, Matu, Zotung, Tedim, Mindat, Kanpetlet, Mizo an itel hnalo. Cun UPC, RC, Sabbath, Jehovah Witness, Full Gospel, le Kawlmi sinah aa pummi an itel rih hna lo. Hakha le Thantlang peng chung i protestant deuh Khrihfabu 14 in dirhmi asi caah ruahdamh khawhmi cu, Australia Chin Khrihfami vialte huap in kan fale hngakchia an va tam lai ning tuaktan khawh asi.

Hi hngakchia hna hi kan miphun sinak le Khrihfa cawnpiaknak tha he lamding ah kan hruai thiam hna ahcun, kan miphun sersiamtu le kan Khrihfa sinak a dirhkamhtu tha hna le Vawleipi hruaitu ah an i chuah dih te lai. Human Resource hi resources vialte lak ah tha bikmi le a biapibikmi asi. Nelson Mandela nih a chimmi cu; “Our children are our greatest treasure. They are our future" ati bang kan fale ahhin a hranphum (investment) kan tuah hi a biapi hringhran.

Hngakchia zohkhenh le cawnpiak hi a fawi hrimhrim lo. Kum 5 leng Sunday School ah caan ka rak pe ve. Zarhpini fatin zapi sinah pumh thiamlo in kan fa kan naule a cawnpiaktu Sunday School Saya/mah vialte upatnak kan pek hna. Bawipa Pathian nih lam in hruai in thluachuahnak in pe chin ko hna seh.

Photo credit to: PCBC facebook page & Amos Siang