Lungfah tuanbia. Phongpi Dingdi

Lungfah tuanbia.


Phongpi Dingdi


Ka ban in a ka tlaih, a orh lei kut in  ka biang cu nem tein a ka muai, tlaihchannak, ruahchannak le zawnruahnak mitin a ka zoh, " Adin,  hiti sawsawh men hin cun na um ding a si tung lo, nang  cu na ropui tuk, nangmah ah teikhawh lo mi nun, a fek mi nun a um" tiah  dinte in a ka sik. Kal kai tim  ka tho,  fek tein  a kut  hnihin a hun  ka kuh than. Lungcim tein ka trangah a bek, cun "i lungsak cang ko usih " tiah  ther ziahmah mi a hmurin lungdongh nak bia a hung thang, cu bia cu ngaih har kati hringhran, chuah kai tim , fak deuh in a hun  ka reh I, " I lungsak cang ko" tiah  a hun  nolh .. Kan karah khenkhamtu ral  maw rak lian, velhle bia bia maw rak thang, pheu tu maw an rak um, duh na bu  kan i  kawp khawh lo  I, theih lo karah kham  maw kan si  I, kan lam a tluang ko hlah maw i  kati lio ah valdang trang cu a pawm diam, kan lam cu rose par in phah mi hlah maw kati lio ah a par a chuah kho lo I, a hling  le a kung lawng an rak si cu chinchap ah keimah lawng in ka pah .

" Kai lungsak ko lai , kadawt, Pathian samhrisih kan si tung lo, Pialral ah tal  khin thang kan chuah tri ve te lai mu " a lu  a von tun  i, ka hmurah dintein a von ka dawp.cucu "damtein mangtha" a tinak asi, zeidang kan chim kho veve lo.


 Keimah santlaihlo caah asi, zarhnolh zarhteni khi " Ka thinlung  chungah kum 7 chung  ai uam  cang mi Dawtnak ka samh ni dingin minung  lei hawih cun khua kan khan mi a si, a hlawhtlin khawh nak hnga Pathian sin zawngah thla ka cam, a nih zawng nih a lung a tling  ve ko lai timi cu a hoiher le holhrel  in ka theihthiam.
A sinain aw. .... Hi lai hi hngal cia  usih law kha ni kha pumh kai thawh bak lo ding, tutiangah hin Pathian sinah ka lung a tling kho lo, a khuakhan ning  hi a lai lo tuk kati, a biakinn thiang  kai pumh kar te hmanh ah ka dawtcu midang sinin  a ka ven  piak kho loh maw? Kai pumh karah khan ka inn cu rak baoh in ka thil hna cu rak fir  hna sehlaw ka hngalhthiam  ko lai, ziah amah ka thangthat  lio theng  te ah hi vawlei ah ka duh bik mi, ka nunnak hmanh ka thap mi hi a ka lak piak, lakpiak lawng hmanh a si lo, midang a pek, timi hi ka thinlungah a ngan  tuk hringhran. Sianlonak he, lungtlinlonak vialte he..mah sual I phawtnak he, midang zumhlonak he.



Valdang cu a pawm  caan cu a liam.


Ka hawile hna nih dinzu le nihchhuak bia hna in ka nun hnemh an I zuam, mah hngal lo tiangin sawn hliahmah in kan inn ka lawi caan a tlawm lo, Dang lengmang in ka nii, asinain zu le nihchhuak hna hi ka caah lih  lawngte  an si. Atak asi mi cu hitu hi asi, Thlarau pakhat ka lungchungah  riangvai ngai in a trap zungzal, zungzalin.


Kum sau  ial a liam  cang, Ruahlo piin Kan i  tong than. " Na dam maw ?" Ti dah lo bia  chim awk kan I harh veve.  A awaan ka hun  theih , a muihmel ka hun  hmuh ah dawtnak nih a chuahpi mi zaangramnak, ngaihnak, ngeih duhnak ti bantuk pawl cu somei  bangin ka lung chungah an alh. Cutin lungtling lo ngai cun zeitlukin amah vangah ka tuar, ka hrum  ka li  a len  ti zawng chim lemlo in diriam tak hmanh in bia ruah manh  lo khin, i  hnawhhnam ngai bantukin ka kal tak than, nain ka thinlung nih cun a kal tak bal lo..

Ka chung  le hrangah hnawksak ka hei si cang Zia, nain ka hrangah thlacam an dai bal lo, Bibal ca an ka rel piak, Pathian bia an ka chimh, an fapa zohthla ve mi cutlukin a nun a sivangh le a tuar an hmuhah lunfahnak, zaangfahnak le ngaihchiatnakin an khat, khawtlang nu le pa hna zawng nih " hipa  te hi cu mifel, mipuitling tak tak asi te lai tiin" an fak mi kha tucun  mah hngal loin khawlakah zuu a rit  I, ai  velh caan a tlawm tilo.  A kut  kiah  le ai khawnden nu pakhat ruang ah cun a tam tuk cang, cu a si ko bu  cun a nu le pa a cungah  an lung a dong ve ballo,  kan fapa hi mah bantuk a si lo, a thinlung  a dam lo ruangah a si, mah bantukin a um an ti I,  thlacamnak le toidornakin an zohkhenh, Salvation camping hna ah cun an hei chiah. Sinain thinlung  hmape cu tisa  bantukin a dam kho ve tilo.


Nikhat cu zu a ri tuk, luak he thi  he ai  cawh  a Nu le Pa Duh dawtnak nih a hrawh mi an fapa an hmuh ah zoh har anti hringhran trah lengmang buin thla an cam. Zan cu a hong tlai deuh deuh a rit  a hong fim  deuh deuh khua a hung ruat, mi fanaupa .. Ziah mihrut bang khawlakah nu pakhat duhnak aupi in ka vah  Len, Sianghleiruun pakhat hmanah  hruaitu a si kho ve mi, biachim thiam le hruaitu tha tiah  an hngalh tawn mi ngai mihrut bangin ka vah  len nupakhat dawtnak vanchia ruang ngai ah maw a si, Tu a nun le liamcia a nun a caan tha vialte hna he a von tahchun tikah khin, a thin a har amah le amah tu ai zaangfah i  a trap thluahmah, a trah thawng  a nu le pa nih a von theih an von zuan  hnawh tikah an fapa " I ngaihchihnak, lungchirnak le thrat  duhnakin  a rak trah ko kha an hmuh " Kapa, zeitin hen ka um lai. " ruahchannak a ngei tilo mi a fapa lunhdong ngai in a um lio ah hi caan te hi pei lungthrawnnak thazaang pek caan cu a si hi ti a Pa nih a hngalh ko.


"Ka fa ziah na lung a dongh i  ngaihchia  in na um ko, kha trap ti hlah law ka bia hi tha tein  ngai hmanh "


Job A ngan  pakhat, A hme 20- 21 tiang  " Khi tikah Job cu a tho I a puan  kha a thleh I, a lu a kongh I vawlei ah a bawk I Pathian kha a Biak. Cun aa  thawh I, ' Ka nu pawchungin taklawngin in ka chuak I, taklawngin ka kir  than lai, Bawipa nih a ka pek  i Bawipa nih a lak than; Bawipa min cu thangthat  si ko seh " tiah  ati..

Cun Job a ngan  42 a hme 1- 6 hi ka von rel rih lai, " khi tikah Job nih Bawipa cu a leh I: " Nangmah nih zeizong vialte na tuah khawh I, Na tinh mi cu donh  khawh a si lo ti kha ka hngalh. Sihmanhsehlaw ka hngalh lomi thil lianngan kha ka chim hna I, kei i hngalh awk  ah khuaruahhar tuk a si  mi kha ka chim hna, ' ngai law ka chim lai, bia kan hal  lai I na ka chimh lai' Hna theih nak lawngin  nangmah cu kan rak in theih , sihmanhsehlaw a tu cu ka mitin kan hmuh cang, Cucaah keimah le keimah cu kai hua I, leidip le vutcam lakah thu  in kaa  ngaihchih " tiah  a ti..


Job bantukin Pathian lung a tling  mi hi pakhat hmanh kan um lo asinain Job nih cun kan ton lomi harsatnak le sunghzatlaknak tampi a ton cang cutikah Job nih cun zeizong vialte hi Pathian sermi an si le Pathian tuah mi khuakhan mi a si kha a pawm  cun Pathian cu hna lawngin  theih mi si ti loin MIT in hmuh nakah a hman, kafa kan nun ah hin harsatnak le sungzatlaknak phun phun kan ton ve ding a si ko, sihmanhsehlaw Job bantuk in " a kan pe tu cu Pathian a si bantukin a kan lak piak kho tu cu Pathian a si timi ruahnak lungthin  pical na ngeih a hau. Cu hnu lawng lawng ah cun hi thil hi na tei khawh ko lai, Pathian nih fatak  ah an ruah I, an pawm  caah an hneksak nak a si, ziah ka sinah thil na ka hal cun " Kapa mqhcu ka duh " ti tawp in na ka hal  tawn a si lo mei , Van i  napa sin chin chin ah cun kha nak i  tawi hmanh khan hal  law an pek lai, na duhmi cu chim ko kafapa hei hal  tuah usih thlacam tuah hna usih law.. " tiah  kan zate  cun thla kan cam.



Cu zan thawk cun duhsah in zu zawng ka thlah I, a rit  tuk mi ruahnak nih a ka kal tak cang ka hna a ngam I, thinphannak ka ngei tilo ka thlau  cang mi keimah le keimah kai zumhnak kha ka ngeih than I, Pathian nih ka thlacamnak a ka leh a si lai cu ka nun nih zeipaoh tong hmanhsehlaw a tha ko lai a that lo zawngah a tha ko timi ruahnak he ka pah lengmang cang.


Cu hnu cun a kum zawng a liam  cang
Nikhat cu Tluangzapa kan inn ah a hong mang  duak I, "Dingdi a hong tlung  kha rak leng te, na hon huam dingah cun rak kan chon law kan van in lak te lai " ti lawng a chim i  biadang  chim manh hlanah a chuak than.


Ninga zanah Dingdi te inn cun Tluangzapa nih a ka lenpi, sau  thu  loin a kan chuahtak than, Dingdi he hin kum 5 liamcia ah khan Aizawl LSA fresher Social ah voikhat cu kan rak i  hmelhmuh cang cu hnu cun kan I pehtlai, a nih hi a umnak khawpi a hlat deuh caah kan I tong kholo  i tu hi kan voikhat i  hmuhthannak a si. Lungduh bia phun phun kan chim kan I ngai veve kanti lai cu chim ding tampi kan ngei..thingpisen lum  tiangin kan philh nain kan nunchung paoh cu ruunkhat ah coffee a ka siampiak tu dingin a ka umpi peng lai. A kal tak lai lo ti ka fiang.



Sabbath zan cu Tluangzapa te khrihfabu ah tlawhtawn kan ngei bia chim ding in thiah ka si bangin " Four Days has late " timi tlangtarin Pathian bia ka chim.



Kan nunah sunghzatlaknak tong in hi vawleiah kan duh bik mi thil hna hi Pathian nih hong kan lak piak hmanh seh lungthul loin a lei kan panh ah cun kan thlau cia  mi kan sunghmi nakin a tha deuh mi in a kan cham than hrim hrim tawn hihi mitampi nih kan theithiam lo i  tluk nakah kan hman, sihmanhsehlaw nili hmanh in tlai sehlaw a caan ah a phan mi kan Bawi  jesuh nih cun ka thinlung  damlonak hna cu chikkhat teah  a damter khawh timi ka chim "



Cu bia ka chim lio ah cun Senhri zawng zaipawl thutnak tlar hmai cem  ah khin a thu  ve, a lu ai  khun  a ka zoh ngam lo a nih zawng cu a tlangvalpa he khan an i  ngei I, fa pakhat an ngeih hnu ah an I then than, a ngakchiat rih ko ca le a mui zawng a that ning  te in a that rih ko caah nungak tampi nakin a man a tam deuh rih. Senhri sin cun ka mit  ka thrial  I, Dingdi cu ka zoh ni siamsiam tein  a rak ka zoh ve. Cuticun hiti hin Pulpit cung  in ka bia ka peh  than ,


" Pathian nih kan hrang I a tha bik mi cu a hngalh, minung  nih kan hrang tha i kan ruah mi hi kan hrangah an rak tha tak tak lo, Na nun liamcia ah khan hlawt na si bal maw, pheu na si cang maw, na hlawhcham bal maw, sunghzatlaknak le harsatnak hi na tong bal maw, na ton cang a si zawngah na ton lio a si zawngah na ton rih lo zawngah trih hlah, Pathian nih dirhmun tha zawk,thil tha zawk nun nuam zawk pek an duh caah a si. Tiin Kapa nih a ka rel piak mi Job ca cu ka rel I thlacamnak he ka caan ka dongh ter.




Pumh a dih  cun Dawtzuun te group nih thingpi le Chang thaw tak an kan dangh thingpi kan din lio cun Ka hnulei in Dingdi nih a von ka auh I, ka kut  a ka tlaih "Na biachim a tha tuk, Phongpi Editor hi bantuk law Pastor tuan ko a hawng  kati" a kut  no ka tlaih a awaan ka van theih cun chikkhat te cu ka thinlungah thar  than ai  tim  nain, zunput ah a kal mi Dingdi a puanvenh von siamthat pah khin khua hawi loin " Kai manh cang kan trin  be la  maw a hong ka ti" a von kan zoh than ah khin kan pahnih in an von kan hmuh , ai  phuhrung ngai mi  a lo.. " E .. Senhri nangmah maw.. a ti I zeipoi lo phun khin thaw ngai cun bia a hei ruah "


Senhri nih Dingdi le keimah Kong cu a hngalh ve si lai cu " Tuzan cu Adin biachim a tha tuk i  kan von cibai ta "  hei ti.


Dingdi mifim kan ti cu " Sireng tih, Kei zawng a ka ciah  bak , ka hrinthan nolh Deng " a hei ti i  an ni..


Bia sau  I ruah manh a si tilo hnulei ah senhri cu kan kaltak Step kan trum  ah khin Dingdi nih ka kut  ai  tlaih keimah bochan in a kal.


Hnunglei  ah Senhri ho dirpitu um loin kan liam  tiang  a kan cuanh.

C. Vanramdinmawi
( Tenglam )