VULEICUNG FOOTBALL PHILH KHAWHLO MI ANDRES ESCOBER TUAN BIA
Escobar cu middle-class kan timi chungkhar khi an si. Colegio Calasanz ah ca cawn hram a thok i Instituto Conrado González ttangin a graduate. School football teams heiti phun khin professional footballer a si hlan cu bawlung a chuih ve tawn. A darling nu, ha(teeth) lei thiam mi Dr. Pamela Cascardo he kum 5 chung cu tthit-um dingin bia an rak kam i, an i tthit-um ni ding an phak hlan thla 5 a um ah misual nih an rak thah i,lungfak ngaiin a nupi ding cu a kal tak.
Escobar pa cu Darío Escobar a si. A pa nih cun organization pakhat a tuah i lamkam bawlung chuih tawn mi hna caah bawlung chuihnaak a tuah piak tawn hna. A unaupa Santiago zong hi footballer a rak si tthiam tthiam i team management lei i lam a hrawn hlan cun Escober he Atlético Nacional ah an rak umtti tawn i,nuam zong an ti kho ngai.
Escobar cu bawlung a chuih chung vialte ah defender a si peng i, jersey number 2 a hruk peng fawn. Cun minlem(nickname) an rak pek i, "El Caballero del Fútbol" ( "The Gentleman of Football" ) le "The Immortal Number 2" ti hna i rak auh a si . A club career ah cun Colombian club Atlético Nacional le Swiss club Young Boys caah a rak chuih tawn . Nacional cu 1989 Copa Libertadores ah a rak cakpi bal hna . Cun Italy club ngan bik si mi AC Milan nih 1994 World Cup hlan deuh khan an rak sawm i,cu zong cu tlamtling manhlo in a um.
A ram Colombia ca i a debut match cu March 30, 1988 khan Cananda 3–0 i an teinaak kha a si. Hmanhselaw international competition bel cu 1988 Rous Cup ah a si i,ram ca a goal hmasa cem cu England he 1-1 i an i tluk ah a si. 1989 Copa América ah khan kum 22 a si i, match 4 ah a langh ve na-in first round an pelh kho loh. Mah kum bakah hin 1990 FIFA World Cup qualifying match ah a tel hoi tthan i group 2 ah a sang cem an si. Hmanhselaw group winner an siko buin intercontinental Play-off chuih ter a si tthan i Colombia cu 1-0 in an cak. Cun 1990 World Cup ah auh a si hoii, Colombia match kipah a tel viar. Round of 16 tiang lawng an phan kho hoi. Cuhnu cun 1991 Copa América squad ah a tel rih i,match 7 chung a langh kho.
1994 FIFA World Cup qualifying match belte ah cun match khat hmanh chuih lo in a um, hmanselaw World cup ah cun auh a si tthiam tthiam. Hi puai i auh a si hi a chan dongh nak ding, a dawng le caah mitthli tlaknak ding si pinah Vuleicung football caah caan duhnunglo ngai a tlung lai ti thei selaw ram caa i auhlo si kha a duh deuh ko lai. Minung kan ti cu hmailei caan kan nghal famloh cu teh aw.
Vuleicung puai kip lak i a sunglawi bik le a hlei i mi nih an hlorh mi 1994 World Cup i bawlung chuih cu thok a si. Escobar zong cu cutluk puai sunglawi i a tel ve kho ding cu aa lawn ve tuk. Cupinah a dawng lete le a dawt cuknak mi te Dr. Pamela zong nih an lomhpi ve tuk . Cun Pamela he hin thla 5 a liam cun a tthi-um ding an si fawn i, an nungak tlangval lio puai an tel a donghnak ding si dawh si.
June 22 a si i,Colombia ca cun 1994 World Cup i an vawihnih chuih nak ding a si. An chuihpi ding cu World Cup dongtu USA an si. Players hna cu field chungah an lut hna i, a dongtu he chuih ding an si ruangah si men lai, mipi hna an chet ngai.Bawlung chuih cu an thok i,zauh a dawh ko.Hote noh dah teinak an hmuh te lai ti cu zumhthiam har bak ding khi si. Cun caan a van liam lengmang i 1-1 an si.Cuhnu cun American midfielder John Harkes nih chaklei ttangin a rak cross , cucu Escober nih a rak kham i vuleicung football nih a philh tilo dingin anmah lei goal ah a lut. Cun USA cu 2-1 in an cak i, Escober te ram Colombia bel cu World Cup ttangin cun hlonh an si i,an ihpuan hna he an khua lei tlun an hau cang.
World Cup a dongh hnu cun Escobar cu kaa dang hna i caam tilo in an ram Colombia leiah a tlung. July 1, 1994, World Cup ttang i an tlaak hnu ni 5 a liam ni zanlei a si.Escobar nih cun a hawi lete a sawm hna i Medellin pawng El Poblado timi bar ah an kal. Cuhnu cun zu dawr hna ah an kal hawi i "El Indio" timi nightclub an va phan. Zinglei suimilam 3:00 a si cun an hawi hna kha an i tthek viar cang i, Escobar cu amah lawngte "El Indio " ah cun a um. Culio cun mi pathum an hunglang tthan i, cuhna nih cun bia an vun el colh. Cun pahnih nih meithal an chuah colh i, Escober cu world cup i anmah leiah a goal ter ruangah vawi 6 an kah.An chim ningah cun a kaaptu hna nih vawikhat meithal a puah poah ah '¡Gol!' tiin an au ti si.
American football commentator nih a chim ning cun "Escobar cu 38 caliber pistol in kah a si" a ti. A kaptu hna hi an kah khawh nghapin Toyota pickup truck in an choi colh i Escobar bel cu hospital ah minute 45 hnuah a thi ve colh.Lainawngtu hna nih hin ram ca i Escober thazang a rak pek mi vialte kha an nghalh piak ti lo i, a dawt cukmak mi football ruangah a nunnaak cu an lakpiak a si.
Escobar vuinaak caan ah hin minung a tel mi an tam ngai i, mipi 120,000 an tel kho.Kumtin chiarin mi tampi nih a hmanthlak cu amah ttihzah naakah an langh lengmang. Cun July 2002 khan city of Medellín ah amah nghalhpeng nak le ttihzah nakah a lim( statue) an ser mi cu rak samh a si.
Caan hna hung liam deuh hnu-ah Humberto Castro Muñoz timi pa, Colombian drug cartel i an bodyguard cu 2nd July 1994 khan tlaih a si, cun a thaizingah Escober thattu a siko tiin a phuang colh fawn. Muñoz hi Santiago Gallón timi pa, USA le Colombia an chuih lio i phaisa bet naak i tangka tamtuk a sung mi pa driver a rak si bal mi a si. Escobar a thah ko ti cu June thla, 1995 khan fiang ngaiin bia khiah a si i, cuhnu cun kum 43 chung thong thlak ding i lairel piak a si.Santiago Gallon hi lainawngtu cem a siko ti cu mipi nih an zumh dih. Cun Gallon te unau nih hin cozah lei cu phaisa tampi an pek ko hna lai ti si fawn. Cun Dr. Pamela, Escober darling zong nih Gallon te unau hna nih cohzah lu tlai pawl hna an cawk ko hna ti cu Munez kum 11 lawng thong an thlak i an chuah tthan mi nih hin a langhter ngaiin a theih ve. Culioah Munoz nih hin phaisa tam ial cu a don ko lai ti cu zumhchih a si fawn.
Gallon driver
Andrés Escobar lainawn kongkau nih hin Colombia cu vuleicungah a min a chiat ter ngai, Culioah Escober bel kha an ram ca i rian ttuan a duh mi le an ram cu vuleicung hmaiah muidawh i langhter a duh lengmang mi a rak si.
Escobar cu Colombia fans lakah cun philh a si bal lailoh,culawng hmanh silo in vuleicung i bawlungchuih a um peng ko cun theih a si peng ko lai, a hleiin Atlético Nacional's fans nih an uar i an nghalh peng i, an lungchungah a thi kholoh. Escobar an nghalhpeng ko ti langhter nakah "Life doesn't end here" an ti tawn.Cupinah Atletico Nacional nih Colombian league i match an awt hlan i an sakmi hla cu Escober caah an dedicate fawn. A dawng le zong nih Escober philhlo naakah tiin "Andrés Escobar Project" timi cu an kalpi i, nghakchia chanbau deuh mi, bawlung chuih a duh ve ttung mi hna cu an bomh tawn hna a si.
"LIFE DOESN'T END HERE"
Comments