Real Madrid le Barcelona an cak

Zahan zan khan La Liga leiah Barcelona le Real Madrid nih cun an tumpi lete an tei ve ve hna.  Barcelona nih 7-1 in Osasun an biah len hna i, Osasuna hi La Liga ttang in an tla(relegate) colh fawn. Real lei nih Barcelona an cak ti an theih ruangah simen la, thapi chuahin an chuih i, hlan deuh i team ttha ve ngai rak si mi Deportivo La Coruna cu 6-2 in an biah len ve hna.


Camp Nou-ah Barca nih goal thun an i harhlo ngai. Minute 12' ttangin an i awt, a hmaisa bikah an dawt cukmak mi le vawleicung footballer um mi ah mi tampi ca i thiam cem si mi Messi nih hram a thok. Cun Andre Gomes nih goal hnih(30'57') in a peh i cuhnu cun Messi bak nih a chap hoi. Barca cu an i zaa ko lai ti hnuah Alcacer nih goal hnih le Mascherano nih Barcelona a umchung i a vawikhatnaak dingah penalty ttangina chuih goal ve hoi. Mascherano nih hin Barca caah game 300 leng a chuih cang i, atu lawng hi a chuih goal a si. Osasuna hrangah Roberto Torres nih vawikhat a chuih goal ve.

Real Madrid zong nih El Classico i cahlo hnuah Deportivo cu 6-2 in an rak tei ve hna. Zidane nih zarhnolh wenesday i Champions League semi-final chuih ding an si ruangah Ronaldo le Benzema cu a chiah hna.Ai khawn ruangah Bale a tel kho fawnloh. Bawlung chuih an thawk i, an thawk cangka tein Alvaro Morata nih a chuih goal colh.Cuhnu cun James Rodriquez le Lucas Vasquez nih first half tawp hlan ah an chuih goal fawn.
Second half-ah Isco le James nih goal khat ve ve i an chap hnuah a donghnak cemah Brazilian midfilder Casemiro nih goal khat cu a chap ve tthan.

Deportivo hrangah Florin Andone le Joselu-hna nih vawi khat ve ve chuih goal hmanh hna selaw umzia a ngei loh.