MINO LE CAAN, (YOUTH AND TIME)

MINO LE CAAN, (YOUTH AND TIME)

Pathian cu dawtnak Pathian a si bantuk in mi zei paoh thleidang loin 24 hours caan a kan pek, caan cu free in Pathian pekmi a si, nain tlaih ṭhan awk a ṭha lo. Thil hman thiam lakah hin caan hmanthiam hi a sunglawi bikmi a si. Vawlei ah kum zeizat hmanh nung ko u sih law, na hmuh ṭhan khawh ti lomi cu caan a si i cu caan chungah "Mino Caan" zong aa tel ve.

Mino timi hi mirang holh in ‘youth’ ti a si i a sullam cu "A quality of being Young" ti a si. 21 century ah mino tampi ram hruaitu le ram a sersiamtu biapi bik dirhmun ah an rak dir cuahmah cang. Mino tel lonak taktak ah cun zeithil hmanh hi a tlamtling thlu kho ti lo. Mino a ṭhawn ahcun ram ngan a dam i, ram nih theipar dawhte a zun tawn. Mino caan hi a sunglawi tuk i hman thiam hi a biapi ngai. Mi cheu nih a chim ṭheo “No ṭhan khawh si seh law cu aw!” tiah an ti tawn. Asinain cucu saduhthahnak men lawng a si. Mino caan hi ṭhat lio caan a si. Mui lei in siseh, thluak le thinlung lei ah siseh, thazaang le thilti khawhnak lei ah siseh, a ṭhat bik lio caan cu, "mino" caan hi a si. Mino caan hi a ṭhat bik lio caan a si bantuk in hman thiam a hau ngai ve. A hmang thiammi nih cun an nunchung ah an hlawhtling i, a hmang thiam lomi nih cun a nun chungah an i ngaihchih ve ko.

Mino si lio caan hi thinlung a ran bik caan a si. Zei paoh hi rang tuk in tuah kan duh. Thinlung chung i a umning in tuah colh duh a si. Cucaah a herhmi cu tinhmi ṭha tein ngeih hi a si. Tinhmi ṭha tein ngeih setsai loin kal ahcun a hmaan lomi lam zulh sual a fawite. “Na upa tikah zei bantuk teinak dah hmuh na duh, atu in zei lam dah na zulh lai” ti pawl hi bia i hal zungzal an hau. Caan tawite diriamhnak men ah ṭuan siloin tinhmi ngeih in hmailei ah a kalmi kan si kha a biapi ngai. Cu hlei ah Mino paoh cu nuamhnak kan duh cio. Hawi he nuamh le mah duhmi tuah hi kan duh bikmi a si.

Pathian bia nih “Mino na duhmi tuah ko, a nuam na timi tuah ko, caan sau na no ti lai lo. Asinain na tuahmi kip ah Pathian nih bia a ceih te lai ti kha philh hlah” (Phungchimtu 11:9). Kan no lio caan i kan nunzia le kan tuahmi kip ah Pathian nih bia a kan ceih lai i upa kan si tikah, kan tuahmi cu kan zuun te ding a si. Mino kan si lio ah duh thim ding tampi kan ngeih lio caan a si. Cucaah, tinhmi ngei in tlawnlen a herh. Duh thim ding tampi na ngeih lio caan hi taksa nuamhnak caah i thim sual hlah tiah kan forh duh.

“Vawleicung thil phunkip caah caan ṭha a um” (Phungchimtu. 3:1). Kan nunchung kan nunnak caah kan i timhtuahnak ding caan ṭha bik cu mino kan si lio caan hi a si. Mino caan a hmang thiammi pawl cu nun man ngei an si i an damchung sunparnak nih caan khat hnu caan khat a don hna. Caan kan ngeih lio i kan nunnak hi Pathian he hram kan thok a hau. Mino pakhat nih a hmasabik ah a kawl a haumi cu - Pathian tihzah nun hi a si. Cawnnak caah caan ṭha bik cu mino si lio caan hi a si. No lio ah thluak a ṭha i a ran nakin thiam a fawi hlei ah philh lo tein hman ṭhan khawh a si. Caan ṭha kan ngei lio ah hin, nihin mino pawl thil dangdang nakin fimthiamnak cawn hi hmaisabik ah kan tuah ding a si.

LZ Ringlawt