LIH CHIM Vs BIATAK CHIM

LIH CHIM Vs BIATAK CHIM

LZ Ringlawt

Minung caah a biapi taktakmi thil pakhat cu: "i leem" hi a si. Zei thil paoh nih mi a kan leem khawh. Zu din zong nih mi a lem. Cakuak, Kuva, Sajdah, Khaini le a dang Rit-hainak vialte zong nih mi an leem khawh. Cu bantuk zukhmawm le si-ai nih mi an leem hnu ahcun i suum a har cang i, ban khawh a si ti lo. Zeicatiah...kha thilri pawl kha ngawt (habit) le zia ah an i cang cang caah a si.

Zukhmawm le Ritnak sihai nih mi a leem bantuk in hmurka zong leem a hmang ve. Biadik chim zong nih mi a leem. Lihchim zong nih mi a leem. Biadik chim lengmang ahcun biadik ṭanh deuh a si, Lih chim duh a si ti lo. Lihchim lengmang ahcun lihchim nih mi a leem i, lihchim peng a si. Lihchim kha thinlung le kaa nih poi a ti ti lo. Ahnu ah cun mah le mah hmanh, "Lih ka chim ti hmanh hngalh khawh a si lo. "Zeicatiah ngawt (habit) le zia ah a tlak cang caah a si. Ngawt le zia ah a tlak hnu ah cun minung hi remh kan/(a) fawi ti lo.

Caṭial lei cu chia ta rih ko 'sih law...Micheu cu bia an chim tikah, biadik (truth) chim an duh lo. Anmah lam awn-nak le din cohnak bia lawngte an chim, Bia an ngerhnguai; dik te le a sining te in bia an chim bal lo. Bia ngerhnguai (pehhel) chim zong khi lihchim pakhat a si.

Cucaah, bia hi ngerh ding a si lo. Ding tein le dik tein chim ding a si. Bible kan zoh tikah...Jesuh hi zeitik hmanh ah "ngerhnguai" in bia a chim bal lo. Pathian fa a si ai hngalhnak ah ngerhnguai in biachim a hmang lo.

Bia hi a biapit tuk caah, "perh" ding zong a si lo. Bia perh hi thil ṭha lo a si. Jesuh zong nih bia hi biapi tuk ah a chiah caah, "YES" le "NO" lawng in va chim ko u. Cu pin paoh cu Miṭha lo pa sin in a ra mi a si (Matt 5:37) tiah a kan cawnpiak. Laimi caah "Yes" le "No" chim hi kan i harh tuk. Velhle le thluamthlam in chim kan hmang. Tahchunhnak ah - rawl ei fial (sawm) taktak lo in, "Rak ei ve ca!" ti hna....Rawl ṭam tuk ko bu le ei duh ngai ko bu in, "Ka paw a khim tuk!" ti te hna zong velhui bia le velhle an si. Cu zong cu lih an si i, kan nunphung ah lih a tam tuk deuh.

Bia perhnak (perhleihnak) kong ah, minung kan i ralrin a hau. Pathian kong, thlarau kong, Bible kong hna a thei tuk le hngal ngai bantuk in kan chim tikah, "Lih" hna kan chim sual lai ti a phan um ngai. Bible bia zong perh ding a si lo. Zawndamh in fiang tuk in hrilhfiah ding a si lo. Hngalh lomi bia cu "Ka hngal lo" ti hi a ṭha ko. Kan theih (hngalh) fian set lomi ah.. "A si kho men? Si dawh a si? A sawh duhmi cucu a si lai tiah ka ruah?" kan timi te hna zong khi Lih kha biatak in kan chim tinak a si.
Bia hi perh rai a si lo bantuk in, "zuh" ding zong a si lo. Mi nih an chimmi bia kha 100% cun a ho hmanh nih dik tein chim khawh a si ti lai lo. Asinain, an chim duhmi idea (ruahnak) kha tlauter lo ding le thlen lo ding a si. A si khawh chung in an chim ning tein chim ding a si. Zuh piak in tling lo in chim ding zong a si lo. Tling lo in kan chim piak ahcun... cu zong cu lih pakhat a si ṭhiamṭhiam.

Minung ziaza zoh tikah, lihchim hmangmi nih cun midang chiatnak an hmu peng ti a si. Midang chiatnak chim an huam peng fawn. Anmah chiatnak an hmu kho bal lo. Anmah thian i cheh duh ruah ah, midang tu kha sual an phawt tawn hna. Mah chiatnak kha midang chiatnak nih khuh seh timi ruahnak an ngei. Cucaah biadik an chim bal lo. Bia merh, ngerhnguai le zawndamh bia lawngte chim an hmang.

Micheu cu hlen-thawi an hmang. Capo a si lomi, hlen paohpaoh cu lihchim a si. Biatak chim lo a si ko. Tangka kan cawimi hna pek thai lo le thil kan hlanmi hna pek ṭhan lo zong khi biatak kan chungah a um lo tinak a si. Hlan ṭung i pek ti lo cu lih chim a si pinah fir zong a si rih.

A ngaingai ti ahcun, "Lihchim" timi cu thil asiloning in chimmi paoh lih a si ko. Laimi kan nunphung zongah kan hman peng i, lihchim ah kan ruah lomi, lih kan chimmi tampi a um. Tahchunhnak ah, "Nupi khua a tlik tik ah maw, Nusual pakai kong ah maw, Nupi va hal tik ah maw..kan bia an la taktak lai lo, a kan khirh te ko lai...ti phun in ruah cia i, hmaitlam hna, phunthawh hna ken kan hmang. Khikhi kan nunphung ah cun ai dawh ngai ko nain, "Velhle thil" an si.

Lihchim hi phun tam tuk a um. A cheu nih "Min in lih kan chim. A cheu nih chuahni thla in, sining in, tuanbia in lih kan chim hna. Kan silomi pi kan si kan ti. Kan nunnak ah a cang taktak lomi a cang kan ti. Acheu nih "no" ter ruah ah, chuah nithla in lih kan chim. Acheu nih catang awn lo mi le training awn bak lo mi in certificate lem in lih kan chim. Acheu nih exam nak ah ah cafir in lih kan chim. Harvard University le Yale University sianginn kaimi mirum milian fa tampi cu, anmah nih ca tuah lo in midang nih tuah piak chawm in an awng ti a si. Vawleicung Top sianginn hmanh ah cu bantuk a um ahcun, kaa dang ahcun chim hau lo in a um lai ti a fiang.
Acheu nih certificate lem in catang sangsang kan kai. Achinchap ah kan vai i uah chap rih. Acheu nih mi cauk i zoh riangmang in, mah idea bantuk tein cauk ṭial le chuah kan hmang. Anih ṭialmi ka zohchun ti in minṭhatnak te tal zong pek duh fawn lo. Cucu "Plagiarism" ti a si. Acheu nih hlaphuah tikah midang hla-aw he i lo ṭung in, i lo taktak lo in hlaphuah kan hmang. Cu zong cu "Plagiarism" ti a si i, lihchim a si ve ṭhiamṭhiam.
Lihchim hi phun tampi a um rih. Tahchunhnak ah, Laimi pa pakhat cu, an rum ngai nain, bia a chim tik paoh ah, "Kannih cu sifak fa kan si" timi a si. Cu bia cu a uar ngai. Cucu a tha ko nain, A pawng ummi ziar bantuk deuh khi a si. Mirum kan si le sifak kan si timi kha chim peng a hau lem lo. Kan thinlung ah biatak kan chim duh lo ca tu ah kan chim tawnmi bia a si kho. A ngaingai tiah cun vawleicung mi vialte hi an i thawknak ahcun "sifak" viar an si ko. Kan i khat ko hna.

A caan ahcun nunning in lih kan chim cemmi cu - "Nawl cawn" a si. Sifah ngang ṭung i mirum nawl cawn te hna hi lihchim a si. Awka nem ngang ṭung i lungthin puarhraan ngang ti bantuk...hmurka in "Pathian..Pathian" ti i, thinlung in mi-huat, mi rem lo te hna; cun hmurka i sum lo, hmur in biachia chim, volh-pamh hman, chiatser'h hman... tibantuk hna zong nunning in lihchim a si. Kaa in Pathian theih ngang le pianthar ngang ṭung i, thinlung le ziaza in pianthar lo zong nunning in lihchim a si. Nunning in lihchim hi Lih tam bik a si.

Cun...a caan ah cun "Ri" (limit, boundary) in lih kan chim. Laimi cu lo tuahmi kan si caah, lo-ri le lobua kongah lihchim zong a rak tam ngai. Khua khat le khua khat "ramri" kan i cuh tawn. Tiva min hna a phunphun kan bunh i, ramri kongah lih kan chim tawn. "Nan pupa hna nih an rak chiahmi ramri tung kha thial hna hlah" (Phung 22:28) timi kha kan buar tawn. Ramri le Innri kong zongah lihchim kan hmang. (Inn hmun ri hi cu chim hau lo va si ko seh awh..)

Tlangval ṭhenkhat cu "mi-uangthlar" an si. Ngaknu dawh an hmuh tik hna ah, 'Kan rak uar tuk' ti te hna chim hi an ka thawtnak ah an hman. Nu a cheu khat cu, "Khi tlangval nih a rak ka uar" ti zong a chimmi an tampi ve.

Acheu nih kan tuah duhmi thil tuah khawhnak ding caah, a dik lomi thil, a dik bantuk in chimrel kan hmang.
President Bush kha a cozah upa bik pariat he Iraq kong ah lih voi 935 an chim an ti. "Pre. Bush lawng nih 260 a chim!" tiah Center for Public Integrity nih 2008 ah an chim. Politicians hi lihcim cemmi an si. An tuah duhmi tlamtlinnak ding caah cun, biadik chim kan herh a ti ṭung i, biadik a chim lo cemmi cu Politician an si.

Politician bantuk in a cheu cu "Theology" ah lih kan chim. Pathian bia le Bible ah lih kan chim. Duh poah in Bible kan merh i, a lutaw kan leh. Pathian cu thlarau a si caah pumpak le Pathian pehtlaihnak cu midang nih theih piak khawh cu a si lo. A dik le dik lo cu Pathian lawng nih a theih khawh.
Acheu cu Pathian nih chimhmi a si le si lo fiang te i thei lo in, "Pathian nih a kan chimh, a ka fianter" an ti. Acheu nih Hmailei ah a tlung (cang) dingmi an chim i an palh lengmang fawn. A cheu nih thil a tlun tik ah, a tlun hnu lawngah "Hitin ka rak ti cang kha muu" ti in lih an chim ṭhan. Acheu nih "Caan donghnak, thianglawr le 666 kong cawnpiaknak in lih an chim. Hi lihchim le bang cu a tam in a tam lawlaw.

Acheu nih "Kai laar" ti in i laarnak kong an chim. A dik le diklo theihpiak khawh an si fawn lo. A Cauk in million reng lo in an chuah i rumnak ah a hmangmi zong an um. Acheu nih "Hell ah macu pa/nu ka va hmuh, Mahattama Gandhi ka va hmuh; Michael Jackson ka va hmuh; Pope John Paul ka va hmuh" ti in an chim. Aho nih theihpi piak khawh an si fawn lo.

Acheu nih "Van ah Jerusalem an hmuh; Jesuh mui an hmuh; Mary an hmuh" ti in a phunphun ca an chuah. A cheu nih "Van ah Setan a zuan lio an hmuh" ti te hna a si. A cheu nih "Russia ah hell an pemh" ti te hna a si. A cheu nih Canada i lungmeihawl khur an pemh le Satan a chuak ti te hna. A cheu nih tili a thuh taktak nak ah an va pil le Satan an hmuh ti a si. A cheu nih vanmi he kan i tong ti a si hoi! Mah le ruahnak cio in, a phunphun in chim a si.

Vawleicung mit hmuh khawhmi kong i lihchim cu midang nih lih le biatak a si kha theih khawh pah a si i, a zia ngai. Pathian, thlarau, Setan, Hell, Vanram, 666 kong te hna, lih le hrokhrol kan chim ahcun, lih maw a si biatak dah timi kha hlathlai khawh an si ti lo. A dik le diklo theih khawh an si lo. Pathian zong bia hal khawh a si fawn lo. Zawlnei pawl le Bible ṭialtu hna zong hal khawh an si fawn lo. Cucu a poi tuknak cu a si. Asinain zeibantuk kong kan chim hmanh ah, kan chimmi a dik lo ahcun "Kan bia lila nih kan kong a ceih ve te ko lai."

Cucaah Khrihfa zumtu paohpaoh nih kan ruah dingmi cu, zei kong kan chim hmanh ah, Pathian kong a si maw, vawleicung kong maw, bia tha zong siseh, lih siseh, kan chimmi vialte hi an lotlau kho ti lo. Van le vawlei karah an i chawk peng i "Energy" ngei in an um peng. Cu "Energy" cu a caan ah cun minung sinah an kir ṭhan tawn. Kan chimmi bia lila khi kan mah lucung ah an tla kho ṭhan.

Cucaah zeibantuk lih bia kan chim zongah kan chimmi bia lila nih kan kong a ceih ve ṭhan te lai. Pathian theimi he a thei lomi he, piangthar he thar lo he, khamh fiang he fiang lo he, a zuum he zuum lo he, Kanmah cio nih kan chimmi bia lila nih kan kong a ceih ve ṭhan te lai. Cucu Khrihfa zuumtu nih kan philh lo a herh.

Minung thinlung le ruahnak cu X-Ray thlakmi hmanthlak bantuk in midang nih fiang cikcek tein hmuh le theih khawh a si lo. Kan chimmi hi lih a si le si lo cu kanmah le Pathian lawng nih kan theih khawh. A caan ah cun a theipar a chuakmi in lih maw Biatak dah a si timi an lang tawn.

Cucaah bia kan chim hlan ah ruahcia le i ralrin a herh. Donghnak ni ah cun zeizongte a lang te lai. Midang bia nih kan kong a kan ceihpiak lai lo. Kanmah bia lila nih kan kong a kan ceihpiak te lai. Biadik maw na chim..Lih dah na chim timi kha caan dongh ni ah cun Pathian hmai ah phozar dih an si te ko lai!!!