NUPI TTHIT A DUH MI PA

NUPI TTHIT A CUU

Lawngtlai : 16 June.2017: The Phongpi Post ( ONP)

Biakthanzual Kompa

*Ka kum le khua hna ka ruat tikah nupi tthit cu a cuu ngai ko cang, ka hawi le pawl, kum 7 ka si thok i ka komh mi vialte nih an tthit dih cang. Nai i fang beek(bag) pua kho ve mi Salai Fingrei le Salai Tenglam hmanh nih dakaw nupi tthit konglam an caih cang cuh,Liancungnung Hranglung bel hi vaan i chawva chiah bang a hnangam tuk i a tthi rihlo khi si.Frederick Zathang zong Lucy Pa si cang, Abiak bel cu keimah khel a lung a tam i,tuan i tthi dawh a siloh.A cuu ngai cang tiah ka ruah mi ka U Dawt zuun hmanh hi nupi kawlah a uluk ngamsam si men la,"A cengkol ttawl hmanh a ti a fiim viar" ti si ko mi cu a nupi ding cu a ek neem le a kho hmanh a ruat ding phun khi si caah anih cu a mirang holhin "exceptional case" timi khi si deuh rua ka ti.*

*Nupi ngei kho ding le nupi tthit ka cuu ve ko cang i ka ruah tikah cun 'nupi ah hodah ttha cem lai' ti ruat cun khua king ka khak.  Nupi ding ruahnaak pek lio bak cun, santlai ngai siloh hmanh ning an mui naak hmanhin zei bantuk chungkhar dah an si?Ka dawng le nih an duh maw? A fel maw fel lo, zei bantuk lungput ngei dah a si? A ruahnaak a ding maw? Ka dawng le, ka nu le pa, ka u le nau hna he an i daw kho lai maw? ti hna khin nu kip khi kan hei cuaithlai cuh. Cuhnu cun a mui ttha maw? , a tungtlang hi teh zeidah lawh? Mi nih an buar cang maw? A ho he dah an rak i daling cang? tiah liam cia caan ah kan kir tthan tawn.Nu lei nih khin zeitindah keimah le ka chungkhar hi an kan ruah ve lai ti khi ruah a um theng tilo.*

*A hmaisa bikah ka daling nu te a hunglang colh, anih hi ka duh ngai ko, a lian tuk lo nain a hme tuk thengloh i aa za ngai. Cupinah nu le pa le ttaa a ngei ttha fawn. Hmanhselaw kan i duh naak hi a sau tuklo, kan i thei fiang tak tak lo. Cun a dawng le nih an ka duhlo, palai thlah hmanh usihlaw an kan let lailo, cutikah Biak-inn nupi tthit ka duh ttung, ka tthit ding cun ka fir hau. Lam a pit ngai, cuticun ngaknu dang ka van ruat tthan rih hna.*

*Deborah kha a tha tuk ko aa.. A nu khi Nu bu ah hruaitu a si, a pa siseh Bu ah Upa si fawn. Amah cu Mino bu ah treasurer a si pinah caa a thiam fawn, a ttha bak ko. Sihmanhselaw a tawi tuk, cupinah a dum pah i kan fa le an tawi hleiah an dum tuk lai.kei hi ka dum ve pah i kan fa le an var deuh si le kan nu cu ka hei lunghrinh hoi lai,um phot tuah seh.*

*Esther kha teh, a dawh ko, a fel fawn. A nu le pa siseh bu ah chorchem tak mi an si, a pa hrim kha Laipa bak a si, Lai miphun a daw fawn, cupinah amah Esther zong hi biaruah a nuam, ca uk a rel tam ti a fiang ko. Komh a nuam bak, ka duh mi le ka herh mi a nghal kho bak i a daling si cu a nuam khun. Hmanhselaw a zer lai dah ka ti, a pa khel mi nih a zer an ti. A zer bakah cun a fim ttung, kan chungkhar a tthek viar lai i VC peek ka timh zong hi i leet hau lai*

*Men Men kha teh, aw kha te zong a pum faa nain ruahloh leng i lungthin ngei mi si. Ka caa cun sianlo mi a ngeilo, a ka tthenh khawh viar. Inchungkhar cu a ruat tak tak lai ka ti, a phaisa hman ning hna ka ruah piak tikah phaisa heu cu a duh baklo. Kan tefa le keimah ca cun ttha bak ding si, hmanhselaw ka dawng le daw hna lailoh, keimah lawng lawng a ka dawt lai. Cupinah kan inn ah ka sahlawh riachan pawl an duh in an um ngam lailoh i tikhur tii umlo naak tluk khi kan si ko lai.*

*Biakte khi teh, a nih hi a lungthin put cu ttha bak. Ka nau le pawl zong hi a rem dih ko hna lai. A lungthin hi a ding bak mi si, amah lah hi daling a ngei setsailo, keimah he kan i daling ko lo hin cun. Cupinah mahcu nih a buar heiti phun khi chim ding um fawnlo, duh a nung hrim ko. Hmanhselaw a nu khi ka celh bak lailoh, an upa cem va pa zong khi 'sia a hnarphaw an vih mi bang' a duhnaak poahah a hruai le a kalpi, MDC i thlan zongah khatlei party campaign office a kal hmanhah a nawn deng kha mu. Khi bantuk nu he pehtlaih cu vanchiat bak si lai.*

*Nusiang kha teh, aw.... Nusiang hi a holh a tlawm i, mino zongah an chorchem bak mi si. Mui ttha tuk cu silo hmanh seh chia tuk cu siloh hi awh, cupinah rian ttuan zong a duh bak fawn. Hmanhselaw, vei Pa Uk, ka pa Iang Hlei pa fa upa bik he cikhatte cu an i daling i, a buar ti si. Ka tthit cun ka unaupa Pa Uk nih a ka thlang lamh tuk lai.*

*Parte kha teh, aw a mui zong a za ve ko, mino bu zongah caan a ngeih cun a tel ve lengmang ko. A tung tlang zong ttha i kan tefa zong an ngan deuh ko lai, mirum chungkhar an si fawn, BA  si fawn, a zaa bak ko, hmanhselaw kuakzial a zu, kuva a ei, sahdah a hmuam, khaini le tikawr zong a duh fawn, a chelah a ri pah tawn i a lungthawh che lawngah mino cun a tel ko ti si. Loh si ne, a kuakzial, kuva le zu cawknaak hmanhah budget tuahpiak hau la, ei awk kan ngei ti loh.*

*Suirem kha teh, aw mah kha te kha ttha ko lai. A fel ngai mi chungkhar an si, a nu le pa cu zuumtu ttha ngai an si fawn. Cupinah amah kha Ttamhmoih cu thiam bak, a angki le tawhrawlh hrim kha aa rem kho fawn. A ha a thiang fawn, a tulio holh cun "A fresh bak". Hmanhselaw rian a ttuan kho lailo, kan sifaak ttung. Aa hrukaih cawknaak, a vun a ngo ter naak,a sam color nak, chun a eidin, ka dum vah le ka lo thlawh  hlawhfa man cu a dih cang, fa hmanh neih ngam a si lailoh.*

*Boite kha teh, A nih kha mino bu lei cun aa tel ngai mi siloh, nain in chungkhar colcangh hrimah a ttha bak. A nu le pa nih an dawt i rian hrang zong an ttuan ter fawn loh. Cupinah tra pakhat te a ngei, unau dang an ngei fawn lo, khi vial ram an ngeih mi khi a pa nih 4 leng cu a tthenh ve te ko lai. Hmanhselaw chaklei sang pa Sanghlei fa a pawi cang i, an hlonh tiah mi nih an chim. Ka tthit cun mipi nih zeitin dah an ka neek lai i Sanghlei hawi le pawl hrim hmanh khi ka hmu ngam hna lailoh.*

*Noami kha teh, Eeee a nih te kha lahkhah ei a si, cupinah an chungkhar zong lahkhah ei an si deuh dih ko. Cathiam chungkhar an si fawn. Nain mu a mui te hi dakaw a chia ve tuk ngamsam cuh. Van tthi ninglaw a ttamhmoih hmanhah mah khi siko mi cu zingchiar a thawhphak te i van hmuh ko ding cu ruah awk tthalo si. Cupinah van zaw seh, a muichiat a chap tuk lai ding cu, a zauh hmanh zauh huam ding si lailoh. Phaisa khat tthup nei hmanh usihlaw zingchiar thinhar cu a nuam theng laloh. Motor a leng lei thar ngai i lampi a tang peng mi kan lo sual lai.

Acu reru cuh, hawi dang nih hin zeitindah *nupi ka tthi ko lai* tiah bia an khiah khawh ngha? Nupi ngeihlo i um cu mi lung zaatlo cu kan si ttung, an ka duh i an ka uar hlan hmanhah tthit awk le ka caa i a tling i tlak mi hrim ka hmu ttungloh, mi vanchia maw ka si mi vanttha hme ti zong hi a ruahtonh awk hmanh ka nghal tiloh. Keimah hi zeitindah nungak pawl nih khin an ka cuaithlai ve ning si ti khi hei ruat ninglaw aa ning deuh men la. Nain kan nupi ding cu hawi hlan i kherhlai hmasak cu si fawn ttung cuh. Mi ralchia ka si ruangah si meen la tiah nupi tthit i raltthat ngai cu a herh tuk mi si theng zong ka thei fawn ttungloh. Ruah lengmangah nupi tthi lo i kho tuh dawh ka siko.