A PEH IN UEFA CHAMPIONS LEAGUE I CHAMPION HMASA CEM REAL MADRID

Nizan khan Uefa Champions League final cu Millennium stadium, Cardiff ah Juventus le Real Madrid nih an chuih i Real Madrid nih Juventus cu 4-1 in an tthuat hna.

Juventus 1-4 Real Madrid
(Mandzukic 28') (Ronaldo 21', 64', Casemiro 61', Asensio 90' )

Juventus XI : Buffon; Barzagli, Chiellieni, Bonucci, Sandro; Pjanic, Khedira; Alves, Dybala, Mandzukic; Higuain.

Real Madrid XI: Navas; Carvajal, Ramos, Varane, Marcelo; Kroos, Casemiro, Modric; Isco, Benzema, Ronaldo.



First half an thok cangkaa in an i nor deuh hmiah hmiah i, Juventus lei an ttuan a ttha zawk ti awk a si. An i tluk ngai i teinaak hmu kho ding awk zong nghalhthiam har ngai. Juventus lei nih shot an nei pah, nain an chuih goal kho loh. Minute 21 a si i, Ronaldo nih ball a tlaih, cucu Carvajal a pek i, anih nih Ronaldo a rak pek tthan, cun Ronaldo nih a chuih goal.

 Juventus lei nih an um sawsawh loh ti minute 28 naak ah an langhter ve i, Sandro cross cu Higuaín nih a ttangin a rak donh i Manzukic a pek, anih nih bicycle kick i Navas banh phaklo in a goal. Cuticum 1-1 in first half cu an dongh.

2nd half cun Juventus lei game an tlaih ko nain Real Madrid lei ttiihnung an si deuh. 61 minute a si i, 40 yard hrawng ttangin Casemiro nih faak tukin a vun chuih, cucu Khedira nih a rak tongh i Buffon banh khawhlo naak bottom corner ah a lut.

Real Madrid caah Ronaldo nih a chap hoi, an chuih goal ttang i minute tam a liam hlanah Modric cross cu Champions League i a goal 105 naak,  European competition i a goal 108 naak le atu season i a goal 12 naak dingah a chuih goal si.

Minute 84a si i Juventus lei lungdongh chapchuan dingin Cuadrado nih  Ramos cu diinte in a nam i, Ramos cu thi lai chaih in a chaih, Cuadrado cu Yellow card vawihnih naak pek a si i red card i a zulh colh caah chuahter a si.

A dongh laite ah Marcelo ball cross cu a lut thar mi Asensio nih cool ngaiin a chuih goal ve hoi. Cuticun Real Madrid cu 4-1 in an cak. Real coach Zidane cu season 2 coach rian a tlaih chungin Champions League ah a champion ve ve i, hlorh phu te si.