NU-EI LE FA-EI TUANBIA

NU-EI LE FA-EI

Hlan lioah nu le va  an rak um I fapa pathum an ngeih hna.  Upa bik kum 10 hrawng a si ah an nu nih a thihtak hna caah an pa nih nupi a hun ṭhit.  A nupi nih cun a fa-ei le cu cu a huat tuk hna ah hin arpi hranag hi a taw le a hmaiah thichuak lak in ai huahter.  Lo in a vapa a hung tlun tikah, “Na fale an ṭha lo, ka taw le ka hmai hna keu cikcek in an ka kheuh dih, na fele na thah hna lo ahcun ka kal lai,” tiah an ih lioah a chimh.  A nupi bia cu a zawn zau ve i a thinhun in a fale cu a auh hna hnuah an pathum in hai  hmin kan lo lai tiah a kalpi hna.  Hai kung cu an kai kho lo I hlei an donh.  An kai dih in an pa nih hlei a phehkanh hna I inn ah a tlung.

A fale cu an khuaruah har in an ṭap lengmang.  

 Cu tikah an nauhniang bik nih, “Ka ule hi ti kan ṭah hi zeihmanh a ṭhahnem lo, ṭum khawhnak in kan I zuam lai,”tiah a ti hna.   A ule pahnih nih cun, “Zeitindah kan ṭum khawh lai, hai kung cungah thih ding lawng a si ko cang hi,”tiah an ṭah a zual chinchin.  Cu tikah an nauhniangpa nih, “Kan lupawng le kan biar kan phoih lai, ka tai in kai khih lai i biar in duhsah tein nan ka thlak lai,”tiah a ti.  An pehmi  an lupawng le biar in an nauhniangpa cu a tai in an khih I an thlak hnuah hlei a hun donh.  “Ka ule, nan thinphang hlah u, hai thei kha tampi in hun lo u law kan nu le kan pa kan phurh hna lai,” tiah a ti hna.  “Thi hna she a kan timi cu  hai zong phurh awk an si lo,”tiah a ule nih cun an ti.  An nauhniang nih cun, “Sihmanhsehlaw, kan nu le kan pa cu kan lehrul hna lai lo, tam piin hun lo ko u,”a ti hna.  Hai cu tam ngaiin an phurh i an tlung.  Hai cu an nu-ei nih cun a ei.  Hai ei chawng ah cun a tha a nuam nain a hnuah cun, “Na fale hi na thah hna lo ahcun ka kal lai,”a ti ṭhan.

Tuhmui le paikawng an i phurh i hralawn cawh ah a kalpi hna.  Hralawn an cawh dih hnuah, “Ka fale, hraliam khur hi a thuk maw, nan pathum in vung lut tuah u,”a ti hna.  An vung luh ah khin lungpher kaupi a chinh i vawlei a chilh dih hnuah hraliam cu a phurh I a tlung.  An unau pathum in an ṭap lengmang i a hnu bik ah an nauhniang nih, “Ka ule kan ṭah lengmang hi san a tlai lo, kan chuah khawhnak tu ruah a hau; kan hrukpi in vawlei hi khorh hna u sih,” a ti i bahra khur tlang vawlei cu an hrukpi in an khoih an verh lengmang i nit hum hnuah an chuak kho ṭhan.  “Thi hna seh tiin kan tuah ko hmanh hna seh law hraliam bawm khat cio in kan cawh lai,” tiah an nauhniangpa nih a ti i hraliam cu an cawh i paikawng khat cio in hrum lengmang in an phurh.  An nu-ei cu bahra a um lio cu a or tha a nuam i ṭha ngai in a um.  Hraliam a hung dih hnuah zan khat cu, “Hrangchia tang kho lopi, ka fale ka thah hna na ti, na thah ṭung hna lo; an ka vuaknak ah ka hmai le taw vialte thichuak dih le keu dih cikcek in a um; na thah hna lo a si ahcun ka kal lai,”tiah a taw le a hmai cu a hmuhsak.  A taw le a hmai cu a fah a celh naloin ai kheuhter hramhrammi a si.  An pa nih cun thah taktak cu a ngamh lo I an thih khawh nakding zeidindah ka tuah lai tiah hngilh loin zan khuadei a ruat

.

A fale cu a auh ṭhan hna i hreitlung pakhat cio a kenter hna. Ramlak ah far kung nganpi  a hauter hna.  Far kung cu tikuang ah kan saih lai a ti i an saih.  A chin ah thingphel   an tuah.  An pa nih cun , “Vung lut u law, nan pathum  nan i tlum khawh ahcun sanghra tampi ciah khawh a si lai, a ti caah an vunglut.  Cu ahcun a chin a chinh i hri in fek tein a ṭem hnuah chengpalang hmun  chia ah a hrilh.

Kuang cu a vung ril lengmang i hmunrawn ah a tang.  Sihmanhsehlaw unau pathum hna cu an thi lo.  An chuak kho ti lo i, an ṭap lengmang.  Mah liaoh cun vate kuang cungah a hung kai thawng an hun theih.  Ähodah kan cungah a ummi cu na si.  Kan mah te hmanh kan thi lai maw, kan nung lai dah tiah khuaruahhar vansang-au in kan um ah,”tiah an ti.  Cu tikah vate nih cun, “Hri ṭemmi kan chahpiak hna lai I, nan chuak lai ka ti pei a si ko, tiah nan hei duh lo le ka kal ko lai lo maw,” tiah a ti.  Cu bia an hun theih  ah cun, “Hriṭem na kan chahpiak kan hngal lo i pei a si tiah, zaangfah tein hun chat dih ko,” tiah tha nuam ngai in an hun ti.  Hri cu a chah dih in a zuang.  An unau pathum in kuang chin thingphal cu an tha dih-umnak in an hun thawn i an chuak.  “Kan nu le kan pa cu kan fuh ngam ti hna lai lo; thingthei ramhnah hna hi kan ei ko lai,”an ti i buk an i sak, bahra an co, thingthei ram hnah an ei i an um.

Ni khat cu an buk hmai thingkung cungah ṭhuro ai fut ko kha an hei hmuh.  An nauhniangpa nih chai in tla ko a chaih.  Ṭhuro cok ah thlaicui phun tling an chuah.  Lo an tuah i cu thlaici cu an tuh.  Rawlkung cu ṭha tein an kheu dih  i rawl tam ial an lak.  Kum khat hnu kum khat in rawl cu an ngei deuhdeuh i kum thum hnuah cun ei cawk loin an ngei.  Cu lioah cun paam a tlung i an umnak khua hna cu ei awk ngei loin an um.  Mah hna rawl cu a pawng khuami hna nih an hun cawk hna i chawva le sia hna cu an in khat le an inntang khat in an ngei.  An fang sukmi favai cu tilu nih a fenh i  tiva  kam cu favai lawngte a khat.

An nu-ei le an pa zong cu ei awk an ngei lo i an thi deng.  A npi nih, “Hnarchia tang pa, pur va phur,” tiah a ti.  A vapa cu tiva i a fenhnak favai cu a zulh lengmang i a fale umnak a phan.  Ka fale an si ti awk a hngal lo nain a fale nih cun an hngalh peng ko.  Buh thaw le sa thaw an chumh.  An sining kong an chim tikah an pa cu a lung a hung pem i ka fale ti a hngalh hna.  A ṭap i a ngaihchiat le a ningzah a celh lo, a thi deng.  Rawl cu sawngkhoi khat in an rawnh.  Facang cawknak i ai kenmi hreitlung cu sawngkhoi chungah a hngalh lo karah a thli in an sanhpiak.  An nu-ei caah buh le sa an fun i a chungah ṭthim an chiah.                                                                                                                                                                               

An khua a vung phak i a thil a ṭhumh ah cun a nupi nih thil chuah cu a in ai nam i buhfun le hreitlung cu rianrang in a hun chuah.  Cu tikah a vapa kepi cu hritlung nih tan ko a tlak i a thi.  A vapa ruak hmanh zoh loin buhfun cu rianrang in a samh i a ei ai nam.  Kaa hnih thum a hun i barh ah a hrom ah ṭhim nih a chunh i a thi ve.