Mizoram Governor Lawngtlai ah a tlawng.

Mizoram Governor Lawngtlai ah a tlawng.

Dated : Lawngtlai , The 26. January. 2019

Phongpi (ONP)

January ni 24, kum 2019 ah khan  Mizoram Larsap Pu Kummanam Rajasekharan cu Lawngtlai ah a tlawng i,  Governor nih hin zing suimilam  9:10-ah helicopter-in Lawngtlai a phan i. Lawngtlai District Police-nih guard of honour rak pein, Lawngtlai DC Pu N. Chakhai MCS, LADC CEM Pu T. Zakung, LADC Chairman Pu V. Zirsang, Lawngtlai SP Pu Amit Goel IPS le official dang hna nih an rak don.

LADC Complex-i Governor donnak tuah mi ah  Governor  Pu Kummanam Rajasekharan nih cun  May ni 29, 2018-ah Mizoram Governor-a si hramthawk in Mizorama Autonomous District Council (ADC) pathum hna pal dih a duhnak kong a rak chim cang i tu hi a voikhatnak le ADC lakah a hmasa bik si dingin Lawngtlai a hon tlawn khoh mi cu ai lunghmuihnak kong chim in. Lawngtlai District cu Mizoram lawng silo, India ram pumpi ca zongah district pawimawh ngai siin, India Northeast chawlehnak mui thleng kho tu ding   Kaladan Multi Modal Transit Transport Project (KMMTP) lampi tuah lio mi district a si pinah , India, Myanmar le Bangladesh hna ramri i tonnak a si fawn caah Lawngtlai District le a chung i a um mi hna nih cun State le rampi huap hrangah mawhphurhnak an ngei a ti.  

India ram Phunglam nih Sixth Schedule tang i Governor mawhphurhnak a pek bangin, Lawngtlai a tlawn hmasak bikah Lai Autonomous District Council (LADC) riantuanak lei ah a lung a luh deuhnak kong chim in , LADC a tlawn khoh ah cun a ramchung hmasawnnak ding ah LADC-i mawhphurhnak a ngeih mi hna a hngalhfianter khoh lai nak  hna beisei nak a ngeih mi zong a chim. , . Miphun nunphung le thil hna zohkhenh kongah Lai Miphun cu an i thanghthar ngai si in a hngalh nak kong chim in, cu miphun ngan zia cu nunpi dingin a cah hna i, Ram thanchohnak ding caah mipi nih an  mawhphurhnak  hngal fiang i India ram hrang i a that khoh nak chung in riantuan ding in Lawngtlai mipi hna cu kan nawl hna tiah a ti. 

Hi caan hmannak ah hin LADC- Chief Executive Member (CEM) Pu T. Zakung nih Governor  lawmhnak bia chim in, Governor nih LADC a tlawn mi cu Lai miphun caah cinken peng ding mi a si tiin, Governor hi Laipuan rak pe in YLA Hlaremhbuu nih Lai hla an sak pinah Lai miphun lam an rak hmuhsak fawn. .

A donnak caan hman dih hnu ah hin Governor nih cun LADC Complex-ah Finance and Account Office building thar saknak ding  lung phumin, Mizoram state thing 'herhse' a phun colh i. Hi hnu ah hin CEM Conference Hall-ah LADC- Executive Member-hna le Department hotu hna he tonnak ngei in, ramchungah thanchohnak cak deuh in a kal khoh nak hnga chimti nak ngeih a si i, hi hnu ah hin College Veng i LIKBK khrihfabuu tuah mi Damdawi inn  Lairam Christian Medical Centre (LCMC) sak lio mi le Electric Veng i District Hospital hna a zoh i . Circuit House-ah state cozah tang i department hotu hna cu District thanchohnak ding ruahti nak a ngei than hnu ah zanlei suimilam 2:45-ah helicopter-in Aizawl ah a kir than.