LAI ARFI REV. C. TAN MANG OF CAWNHU

Rev. C. Tan Mang ( Tlangmawipa) cu kum 1912 Nohawng ni 7 ah khan Nam Ceu Cinzah le Sun Thai Aineh fa upa bik si dingin Cawnhu khua ah a chuak, Cinzah Zahnak phun an si i, a Pupa hna cu Zahnaktlang Bawi Za Lal niha hrinsor mi an rak si.

            A chuahpi a nau le ah C. That Hmung le Ngun Lal (Aizawl Post Master a rak tuan mi) hna pinah hin Farnu pakhat te an rak ngei nain hi nih hin a hngakchiat lio tein a rak thih tak hna.

            Cawnnak lei ah cun kum 1927 ah Lower Primary a rak Passed cathiam kho ngai mi a si nain a hringtu a pa nih tuan tuk in a thihtak caah cawnnak cu peh thai kho loin a pu Ri Luai ( a nu ta) thithruainak tangah chungkhar cawmken cu a kutah a hong um.

            Kum 1938 ah khan Pathian nih a hrangah a ruat mi MC Hrang Nawn he khrihfabbu phunglam ningtein thitumhnak an rak tuah i Pathian pek mi fanu Fapa panga (5) le fany pali (4) an ngeih hna, cu hna cu :

            1). Kalvary Tlang Mawi

            2). C. Za Lal

            3). C. Chia Tial

            4). C. Neih Kim

            5). C. Van Tlung Luai

            6). C. Lal Tluang

            7). Sang Pui

            8). C. Lal Nun Sang

            9). C. Van Lal Tha Hlun

            India rampi nih Zalonnak a hmuh le cangka khan Pawi- Lakher Regional Council (PLRC)  kan ngeih khoh nak hnga caah ti in a si khoh tawk in a colcang ve lengmang tawn mi a si i , P-L Regional Council Election hmasa bikah Lawngtlai bial tangin Member of Regional Council (MRC) ah thim hmasak bik mi zong a rak si fawn, a voihnihnak Election ah hin cun thimnak cuh ve tilo in Nominated MRC bantuk a luh in an luh, China ral ruangah Cozahpi nih thimnak a tuah khoh lo caah a term cu a sauh piak caah a peh in kum 12 chung cu MRC rian hi a tuan.

            Rev. C. Tan Mang hi muitha ngai a si pinah a tungtai zong ah zoh a co I mi a hip kho ngai mi pakhat zong a si ve a san hoih ah hin ft 5.8 a si I, a tlanval thawk te in Pastor Than Zing thithruainak tangah Pathian riantuan hram a rak I thok cang mi a si I Kum 1949 ah Khrihfa Upa ah thim a rak si. Cu lawng si lo in Baibal a duh ngai ngai mi a si i caan a ngeih paoh ah cun a caan lawng hi Baibal ca rel nak in a dih tawn, Ralpi Pahnihnak lio ah Labour Corp ah a tang I Labour Sirdar sinak in a tuan colh, Kum 1945 ah khan Chawnhu khua in Lawngtlai ah a chungkhar hna he an rak pem, Lawngtlai a um hnu zongah hin a pawngkam khuasa le a hawikawm cingla rual nih an tlaihchan ngai mi le an bochan tak mi pakhat a si I, kum 1991 ah khan Lai Autonomous District Council (LADC) nih cun Most Prominent Person Among Laifa ah an rak thim I lawmman tiangin an rak pek.

            Pawiram Baptist Khrihfabuu a hong dir tikah khan Pathian nih mahte in khuakhan lairel nak Autonomous Council a kan pek cu ve bantukin Khirhfabuu zong nih a kan pek ve a si ko tiin lunglawm le thanuam tein a lut ve colh Tirhkoh rian siseh Pastor rian tiangin a tuan chin lengmang i Lawngtlai Pastor bialtu hna a hong si fawna caan donghlei ah Reverend sinak cu pek si in a pension tiang Pathian ram caah a tuan mi a si.

            Kum 2002. June ni 15 Hi vawlei harnak hi chuahtakin a rian a tuanpiak mi Pathian sinah ai din.