TOMORROW NEVER COMES

Cattialtu : Lucy Hranglung

          

Tuanbia vialte hi a hramthoknak cu a um dih ko, Sihmanhsehlaw tuanbia cheukhat cu a donghnak ngei lomi an si!!

 Caan saupi hnu ah AaBawi nih a dawttuk mi Nute cu a ton tthan tik ah a lau. Panh sialmal tein a van mirh hnawh, a thin a tur, " aa thleng bak lo" ti ruat bu khin a mit nih cun a lu in a ke, a ke in a lu cuanhthlai, a nolh, a nolh rih. A pum tuk mi a kaupahmi mi a mit-au phen i lawmhnak le iang a cuangmi hna cu a zohcim hrimhrim lo. Nu nih cun " Are you okay?" a von ti, a ar. Leh a tim lo maw si let ding in a kaa le dang hna cu kharpiak an si hnga?. " Aw.. zahan kha pei a thlan i pangpar a chiah-ni a si kha a van theithan. A lilen lai zawn ruatlo in pei mual a liamtak kha, a dawt nih cun liamtak ko hmanhsehlaw caan-khat te hmanh philh ni a um hrimhrim lo i, zarhpini a chuah caan poah hi a thlan va thenhpiak i, pangpar rimhmui a chiahpiak caan a si, a ca-ah cun ni a rak I thleng kho lo mu, nifatin hi Suisui zuun ngaih-ni a si dih ko. Tu zong cu Suisui a hmuh tikah aa lawm lomi khi a si lo, a zaanmang hmanh ah a hlam tukmi nute cu a ruahlopi i a ton tikah a lau i, amah le amah aa zumlo ca-ah a si. 

Mahi Sianginn an kaitti lio an tuanbia roling cu a si, A mak taktakmi an tuanbia cu! 

Abawi  hi pa lungkhong le thazaang ngeimi, a cawnpiaktu le zongnih chimh a ngai lomi tiah an ti mi a si. Asinain a sianghngakchia hawi le khuptthi rual hawi ca-ah komh a nuam tak tak mi, lungthin thiang a kengmi a si, Zu din le kuak-zuk tibantuk hi a hmang I nuam an ti khun. Nichiar sianginn kai aa thawh ko nain Khan(class) cu a phaan bal lem lo. A cawnmi ah hlawhtlinnak ding ah zuamnak lungthin  ngeilo nain nichiar tein sianginn kai cu mah rian ruah in a ruah I a nuamhnak ruang menmen ah a hman! 

Kum khat a liam cun... An sianginn ah mithar an rak luh caan a hung si, a nunnak dihlak a tlengtu ding, vanmi he hmanh tahchunh a sianlo mi a tonnak caan a si lai ti cu zeitik hmanh ah a ruahmi a si bal lo! An kawifarual (group) nih cun amah cu lentecelh le biasawngtlorhpi an duh tawn ruang ah an komh huam ngaingai mi a si. Nikhat cu a lungtak hmanh si lo khin sianghngakchia thar a rak kaimi nungak note Suisui a hmuh I, Suisui cu pehtlaih hram a thok. A kawi le nih an sawi len , " Sianginn-kai nuamhnak ah pei ka ti sawh ko" a ti lehlam hna!! 

Suisui : Tungtai ttha ngaimi, a mui zoh ahcun muidawhtuk ti in chim ding cu silo nain iang a ngei, a vun hawng a nak pah i, a sam a liang can tein aa zuah. A mit kau pah nawn pum rilrial te piang taktak i aa aumi cu van zoh hmanh ah khin midang teinak nun a kengmi ko a lawhter. A zia le cawlcangh zoh tikah mi lung teinak a keng, biaphelh le ziathup khipkhep mi a si lo nain a hawile nih an tlaihchan khunmi a si. A tuahmi paoh ah lungtak tein tuahmi a si ko nain, lentecelh le pa lei khi cu a huam phun a si rua lo, a hawi le nih an sawm ve zong ah caan pek in a telpi zuam tuk hna lo I mahte lawng um a huam deuhmi nungak thianghlim a si. 

Aabawi nih a helh tikah cun a lungtak asilo ti a hmuhpiak ko, zei a va si paoh ah ttha tein a chawnhbiak i, lungthiang te in a komh ve. 

Caan sin ah ni le thla hna cu a liam ve zuahmah i, hawikom ttha ngai in an i tlaihchannak cu an pehzulh. Nain a lungthiannak le a duhnunnak nih cun Aabawi a lungkhong tukmi cu maian zor in nikhat hnu nikhat a zorter ziahmah. Aabawi nih a celh ve ti lo tikah nikhat cu an I-dinh caan (Class break) lio ah a lungchung dawtnak aa semmi le a duhnak ti-thiang bang a luang thluamahmi cu a phuan hnawh. Aabawi cu a lungthli tein thinphannak a ngei. Cucu  phundang in a ruah sual lai le amah he hlatnak ah a cang lai ti a ruah ah a mawh hrimhrim lo, nain a ruahlopi in Suisui cu a mirh, asinain zeibia hmanh a chim lo! An pahnih in an tthu lio ahcun zei thawng theih ding hmanh a um lo,. Asianin Aabawi thintur thawng le a thaw dawp thawng cu a thang chin lengmang. Caan tlawmpal ah "Suisui na ka dawt ve lo zong ah kan theihthiam ko, nain bia kaa-khat tal cu chim ve law" tiah a thintur bu le ttah awchuah buin Aabawi nih cun a kikmi boruak cu a von thlen. " U Aabawi daite in um ko!" Suisui nih cun hawikom sinak in a rak theihtuk mi mitha a si ko nain hawikom sinak leng in a rak ruat ballo tikah a lau I,  ready lo bantuk in a um. A ca cawnnak le hmailei khuasak tintuknak kong ah saduhthah tampi le i tinhmi tampi a ngei I, A saduhthahnak hna cu a ca-ah a biapi tuk i, pa sin ah caanpek in va i buaipi cu a duh bal mi a si lo. 

Aabawi nih lungtli duhnak le dawtnak cu Suisui sin a phuan hnun cun...

 Dawtnak, 

Zawnruahnak,

 Ttihzahnak, 

Hnabeiseinak, cu Aabawi sin in nikhat hnu nikhat hmuh a duh, mah nih cun a phulo bia elnak tete an karlak ah a chuahpi caan zong a um tawn. Cucu tlaichan hram an thawknak mual pakhat a rak si.

Nikhat cu Aabawi nih ka chawn ti lai lo, philh kaa zuam lai tiin bia khiahnak a tuah, Asinain Suisui nih a theithiam kholo, nain zei chimlo le a sullam zong hal loin "Si seh" tiah a leh. "Kan i hawikomhnak hi a fek taktak a si cun nikhat khat cu ngaihthiam a ka hal tthan lai i ka lei ah a rak kirte lai" ti ruahchannak he a hngah..

 Can a hung liam zuahmah hnu Thla thum hrawng a liam cun Aabawi cu aa ngaichih i, ngaihthiam halding in  Suisui cu Angkii a senmi a cawkpiak i, "Suisui, kan ttihzah tukmi le kan bochantuk mi na si. Kan dawttuk, Asinain ka daw ve lo. Kan duh dawtnak hi leh lomi duh dawtnak ah aa cang ding ka rak ruah ah khan ka celh lo i, keimah kaa porhlotnak le keimah zawn lawng ka rak i ruahnak ruang ah an si. Na ka dawt ve khawh lo zongah a poilo. Nain nangmah he i hlat bia hna cu ka hnga- nem ah namte chunhmi nakhmanh in a faak deuh I ka tuar kho hrimhrim lo Suisui cu ca cun na hawikom ah zaangfahnak in rak ka cohlang tthan ko mu, Cun na ca-ah hawikom tthabik ka si lai ti zong kan dawtnak thinglung in bia kan kamh" ti ca ttial tawite a tenh chih i, Suisui cu a pek. Suisui nih cun lunglawm tein a ngaihthiam i, an i kom tthan. Nain Aabawi lungthin i duhdawtnak cu aho sin pek khawhnak le va hrawmh awk ah a sianglo I Suisui he pehtlaihnak hram fehternak ca lawng  ah a ruah khawh. Cucu a thlau kho hrmhrim lo I pehtlaihnak cu nikhat hnu nikhat hram fehter aa zuam.

Suisui nih cun voi tampi an i duhdawtnak a rem lonak hna, chungkhar kong ruah buin le atu  ca cawnmi lawng lawng ruat ding in a chimh len tawn, nain Aabawi nih cun a duh ve lo. Cu tikah Suisui cu a chawn duh hoi lo i, a hrial hram a thawk tthan. An tuanbia cu mah ti cun a hram an thawk lengmang tawn. 

Caan zeikar lo te ah kum thum cu a liam manh. Suisui nih cun tutan cu ka lei a rak kir nolh ahcun hawikom in ka zoh ti lai lo, ka ngaithiam ti lai lo, lentecelh in a ka celh ti phun khin caan sin ah a ruahnak phundangpi in khua a ruat. Cucu caan sin ah a philh lonak le a hlamnak theipar a rak si. 

Nikhat cu a phone a hung ring, "Hello" "Suisui, U Aabawi here, I miss you so much, na tlamtling ko ti" hnu a Phone cu a thah. A ring tthan, a tlaih, Aabawi aw nih cun ngaihthiam a hal, a nawl. Asinain a duh tilo, tuanbia sawhsawh bantuk in mitthli ruah bang sur in tlakter a duh ti lo. A zu-din le a kuakzuk a tthinhlo pin ah lih fa tete a rak chimhmi vialte hna a ruah tikah a ttap, a mithli a luang. 

Chikkhat caante lawng i, i lawmhnak cu a herhlo, Asinain a hawikom tthabik  a U Aabawi ttahnak thawng le itnak thawng cu sianglonak he a ttahpi caan zong a tlawm hrimhrim ve lo. 

Mi pakhat ca i a rak biapi tukmi le an zeizong vialte na rak si tawnmi hna tuanbia sawsawh ah a vun i cang khi cu a fak hrinhran ko. Cucu Sui sui dirhmun a si.

 Aabawi nih cun a sunghmi nu cu zeitluk in dah a nun ah a biapi ti nikhat hnu nikhat aa fiang thluahmah, a dawtmi cu a chungkhar le nih an cohlang lailo ti zong a theih ko buin a lungthin i dawtnak mei-inn aa vaangmi cu hmihkhawh siloin a alh chinchin i, a lung cu nichiar, caan hna sin in Suisui calawng ah a tur, a dawttuk mi nu a co lomi cu vawlei ah nun hmanh a zuamlo, thih a duh, zu ah nuamhnak a kawl, ram a vai, a thlavai a kiang, a umsi a vang, zeithil a tuah poah ah lung diriamhnak a ngeilo. Suisui a chawn ngamti fawnlo, Suisui lei in thawngpang a dai riprep. 

Nikhat cu phone ring mi nih cun a chunmang in a von tthangh! "Hello, U Aabawi, ka aw na thei kho maw? Helen ka si i, nizan ah Suisui nih Lunglei zawtnak in mual a kan liam tak......" tiah a chimh a dihhlan ah a phone ttuang ah a thlak, phone ah cun Helen ttah ik thawng a taang, A biang ah hnawh cawk lo mitthli an luang. A ttap. A mitthlam ah Suisui nihnak le lawmhnak mithmai an cuang. Suisui nih a caan tampi pek in a duhnak a rak zulhnak hna a thar in a theih tthan. Suisui a duhdawtnak a ziam khawhlonak mitthli cu kurkur in a tla.

"Suisui aw ka thin na hawikom tthabik i na ngeihmi san ka tlaihlo ruangah lungfak in maw na liam riangmang, phone ka rak in chawnh hmanhnung bik ah khan ka sin i, na lung donghnak bia lawng na chim tikah kan chawn ngam ti lo cu ta. Kan rak in chawnhnak hmanung bik in Nihin tiang na ngandamnak le thluachuah na hmuhnak ah thla ka cam ko ttung. Voikhat tal 'kan ngaihthiam ko U Aabawi' ka ti law cu kai lungsak kho deuh hnga ka dawt , na ka liamtak lai le hnu na ka chit lai tal ahcun na ka hlam ko lai ti, ka ngaithiam mu, vawlei pin nunnak ah rak ka hngak  hram mu. Cuka hmun cun na duhning tein khua ka sa lai mu Suisui!" a mitthli dawtcawk loin a luang thluahmah. Awchuah in a ngaihchiatnak le a hlamnak a chim kho ti lo. 

Caan sautuk a ttah buin  "Suisui.. nikhat khat cu kan ton tthan-ni a umte lai tiah ka ruah i cutik cun ngaihthiammi dirhmun ah ka dirte lai tiin thaizing ka conh peng, na liam sia ka herh lo maw, thaizing cu ka caah a tlung kho ttung lai lo. Ka ca-ah laksawng cu ka mitthli lawng maw a si lai, zaangfahnak he kan ngaihthiam timi na bia kaakhat tel na ka chimh ta lo Suisui tiah a ttahnak cu ma kho ti lo in nithla sin ah mitthli he lawng caan a hmang. " An caan hmantti mi vialte hna cu a ruat tthan i, nihin i Suisui a hmaika i. adir ko mi cu a chunmang men men an si ti aa fiang, ziah mah tein  mitthli a luang tthan. "An chim a dong bal lomi tuanbia maw na rak ka ttialpi ne Suisui".....

“Nunnak cu phanh khawh dingmi hmun siloin khualtlawnnak hmuntu a si.” (Cliff Nichols)

-Lucy Hranglung

#LaiNgaknu👩#Biazai📝

#PathianLeRamLeMiphunCaah

#MahPahrangCioHmangHnaUsih