LAI NGAKNU LE SIKPAR
LAI NGAKNU LE SIKPAR
----------------------------------------
Khuasik zaan mang cawncawrok nawn van manh hnu in puan a lummi tang ttang zing thli thiang dawp bu i van i hliphlau, tappi hram ah mei taoh pah in ka nu lakphak ti sa te lei le dang sa nawn in van i dinh pah, angki a chah i chah khawh chung in hmai lawng lang in i hrukaih, i thuamnak lumchah tuk ruang ah ban vei hmanh van i harh pah, hnakhaw le kut hna khawkik nih sen viar i a hmeh hnu i Ka nu nih a vamh i aa vammi a chhemmi mei cu a lumnak le a linhnak vialte lak timh in hakkau ngaiin ka kut va phar hnawh, ka tak ah heh van muai chih khin cun ka pumsa vialte nih cun nuam tiin heh khuasik le meilumnak cu an thangtthat! Ralttha tak tak mi lawng hna tikik i an tak an i kholh ngam caan le zingka i leng an chuah ngam caan, aw hi caan hna hi Khuasik caan a nuamhtertu le aa dawhtertu Lai Ngaknu kei ka ca cun va si kun aw.
Khuasik caan hi caan vialte ah ka ca cun caan nuambik a si ko. Van boruak thiang le thliher kikmi hna nih kum thluan i ka lung nuamhlonak hna an thianpi chih. Zaan vialte ah ih a nuamh khunnak le zingkaa i ihkhaan thawhtak a harbik caan, ho paoh nih an ihkhan cung ah merem te i duh dawtmi he i kuh kan hawbik caan a si. Khuasik caan ko nih hin minung nunnak ah khuakik le khualum a nuamhbiknak le a sunglawi khunnak a ka theihter. Thlizil kikmi nih angki chah nawnmi avan pal i tak a van tlaih, hnarkua a vun lut i a kikmi thaw vun dawp riangmang i chuap a van phaak tik ah hin dawh hna a thiangbik i, tha a dam suaimai ko cu. Cun, Mah le zeizong vialte philh i chunmang ah ka van tlau pah lebang khin cun vawlei cung muidawh cem le mirum cem hmanh ka hngar hna lo. Ka thliri lum hrukaih mi tang ah cun khaan zeimaw zat i a kulhmi Siangpahrang Inn naak hmanh in ka ca cun himnak a um.
Ei le din, rawl le ti pawl hna hi khuasik caan hin dawh a thawtbik cuh. Khuasik caan hin awr a hlei in rawl ei ka zong a thaw, theithur hna hi a thawbik.
Fing le tlang, lampi hna romei nih zam chialmal te in zinglei le zanlei i a van bawh i , dapti hna dor khat hnu dor khat an van tlak hnu ,hawikom rual he nitlang toah pahin thei phomh hna van ei pah, kan pawngkam ah semmawng rual lentecelh mi an rak cio len ve caan hna hi a nuamhtertu an si rih. *Khuasik caan le ka tak a lom/thau a zuul* timi an um len hih. Nain sikpar nih a ttianpi mi romei hna le khuathiang a chuahpimi hna nih cun zeitluk in thau le cuam in hung kan chia ko hmanhsehlaw a sunglawi tthiam tthiam ko e . Rawl sa te le tihang sa nawn i van i meh i, ka sa hatmat te i a van luh cun tak a lum, pum a dam i, a nuamh khunnak khi a si.
Siang Inn kan rak kai lio hna khan khuasik caan i kan rak i zuamnak cu a ho dah angki le lukhuh ngei lum deuh heiti pawl hna kha a rak si.
Sikpar nih aa funchihmi Christmas caan hna hin liamcia kan dawtmi hna kan hlam a zual i, an caah vawlei in kan tikhawhmi an thlan va thenhpiak le va ttamhpiak caan a si tikah Tleicia dawtmi hna ca zong ah Khuasik caan hi dah na rak i ngaih cio ve hnga ti hna a ka ruahter.
Hi khuasik caan nih hin ka philhcia mi ka lilennak in aa ka tthangh tthan tawn i, ka lunglen a zualhmatter tawn. Nain a nuam ko, apoi lo, khuasik caan lawngte hi si ko sehlaw a nuamh ning hi!
_Tho thla a liam ruangmang,_
_Sikpar a chuak riangmang._
_Ttian an reel romei,_
_Zaam an reel sikmei._
_Van Bawi chuahcam a nai,_
_Kumkhat rian hraang liam a nai._
_Lung nih hlam, liamcia khuptthi hawi,_
_Zuun tthing an tho, lilen nih mi dawi ._
_Maw kumthar aw, caan ttha chuahpi,_
_Ka philh ter hlah, Caan nih a liammi._
_Rili ti a luang thluahmah bang._
_Kal thluahmah ko ne, na duh bang!_
*Lucy Hranglung*
*Lai Ngaknu Biazai*
----------------------------------------
Khuasik zaan mang cawncawrok nawn van manh hnu in puan a lummi tang ttang zing thli thiang dawp bu i van i hliphlau, tappi hram ah mei taoh pah in ka nu lakphak ti sa te lei le dang sa nawn in van i dinh pah, angki a chah i chah khawh chung in hmai lawng lang in i hrukaih, i thuamnak lumchah tuk ruang ah ban vei hmanh van i harh pah, hnakhaw le kut hna khawkik nih sen viar i a hmeh hnu i Ka nu nih a vamh i aa vammi a chhemmi mei cu a lumnak le a linhnak vialte lak timh in hakkau ngaiin ka kut va phar hnawh, ka tak ah heh van muai chih khin cun ka pumsa vialte nih cun nuam tiin heh khuasik le meilumnak cu an thangtthat! Ralttha tak tak mi lawng hna tikik i an tak an i kholh ngam caan le zingka i leng an chuah ngam caan, aw hi caan hna hi Khuasik caan a nuamhtertu le aa dawhtertu Lai Ngaknu kei ka ca cun va si kun aw.
Khuasik caan hi caan vialte ah ka ca cun caan nuambik a si ko. Van boruak thiang le thliher kikmi hna nih kum thluan i ka lung nuamhlonak hna an thianpi chih. Zaan vialte ah ih a nuamh khunnak le zingkaa i ihkhaan thawhtak a harbik caan, ho paoh nih an ihkhan cung ah merem te i duh dawtmi he i kuh kan hawbik caan a si. Khuasik caan ko nih hin minung nunnak ah khuakik le khualum a nuamhbiknak le a sunglawi khunnak a ka theihter. Thlizil kikmi nih angki chah nawnmi avan pal i tak a van tlaih, hnarkua a vun lut i a kikmi thaw vun dawp riangmang i chuap a van phaak tik ah hin dawh hna a thiangbik i, tha a dam suaimai ko cu. Cun, Mah le zeizong vialte philh i chunmang ah ka van tlau pah lebang khin cun vawlei cung muidawh cem le mirum cem hmanh ka hngar hna lo. Ka thliri lum hrukaih mi tang ah cun khaan zeimaw zat i a kulhmi Siangpahrang Inn naak hmanh in ka ca cun himnak a um.
Ei le din, rawl le ti pawl hna hi khuasik caan hin dawh a thawtbik cuh. Khuasik caan hin awr a hlei in rawl ei ka zong a thaw, theithur hna hi a thawbik.
Fing le tlang, lampi hna romei nih zam chialmal te in zinglei le zanlei i a van bawh i , dapti hna dor khat hnu dor khat an van tlak hnu ,hawikom rual he nitlang toah pahin thei phomh hna van ei pah, kan pawngkam ah semmawng rual lentecelh mi an rak cio len ve caan hna hi a nuamhtertu an si rih. *Khuasik caan le ka tak a lom/thau a zuul* timi an um len hih. Nain sikpar nih a ttianpi mi romei hna le khuathiang a chuahpimi hna nih cun zeitluk in thau le cuam in hung kan chia ko hmanhsehlaw a sunglawi tthiam tthiam ko e . Rawl sa te le tihang sa nawn i van i meh i, ka sa hatmat te i a van luh cun tak a lum, pum a dam i, a nuamh khunnak khi a si.
Siang Inn kan rak kai lio hna khan khuasik caan i kan rak i zuamnak cu a ho dah angki le lukhuh ngei lum deuh heiti pawl hna kha a rak si.
Sikpar nih aa funchihmi Christmas caan hna hin liamcia kan dawtmi hna kan hlam a zual i, an caah vawlei in kan tikhawhmi an thlan va thenhpiak le va ttamhpiak caan a si tikah Tleicia dawtmi hna ca zong ah Khuasik caan hi dah na rak i ngaih cio ve hnga ti hna a ka ruahter.
Hi khuasik caan nih hin ka philhcia mi ka lilennak in aa ka tthangh tthan tawn i, ka lunglen a zualhmatter tawn. Nain a nuam ko, apoi lo, khuasik caan lawngte hi si ko sehlaw a nuamh ning hi!
_Tho thla a liam ruangmang,_
_Sikpar a chuak riangmang._
_Ttian an reel romei,_
_Zaam an reel sikmei._
_Van Bawi chuahcam a nai,_
_Kumkhat rian hraang liam a nai._
_Lung nih hlam, liamcia khuptthi hawi,_
_Zuun tthing an tho, lilen nih mi dawi ._
_Maw kumthar aw, caan ttha chuahpi,_
_Ka philh ter hlah, Caan nih a liammi._
_Rili ti a luang thluahmah bang._
_Kal thluahmah ko ne, na duh bang!_
*Lucy Hranglung*
*Lai Ngaknu Biazai*
Comments